३ असार, एजेन्सी ।
अमेरिका र साउदी अरबबीच युद्धविरामको केही घण्टाअघि सुडानको राजधानीमा भएको हवाई आक्रमणमा पाँच बालबालिकासहित १७ जनाको मृत्यु भएको छ । संयुक्त राज्य अमेरिका र साउदी अरेबियाले ७२ घण्टाको युद्धविराम घोषणा गर्नुअघि शनिबार सुडानको राजधानी खार्तुमको आवासीय क्षेत्रमा भएको हवाई आक्रमणमा पाँच बालबालिकासहित कम्तीमा १७ व्यक्तिको मृत्यु भएको देशको स्वास्थ्य मन्त्रालयले जनाएको छ ।
“यार्मुक जिल्लामा भएको हवाई आक्रमणमा कम्तीमा २५ घर ध्वस्त भएका छन्,“ मन्त्रालयले आफ्नो फेसबुक पेजमा भनेको छ । त्यहाँ उनीहरूले स्थानीयहरूलाई भग्नावशेषबाट शव निकाल्दै गरेको भिडियो पोस्ट गरेको बताइएको छ । अर्धसैनिक ¥यापिड सपोर्ट फोर्सले सुडानी सशस्त्र बललाई खार्तुमको मेयो, यार्मुक र मन्डेला छिमेकमा हवाई आक्रमण गरेको आरोप लगाएको सोसल मिडियामा भनेको छ ।
यसअघि शनिबार अमेरिका र साउदी अरेबियाले दुई युद्धरत समूह सुडानमा ७२ घण्टाको युद्धविराममा सहमत भएको घोषणा गरेको थियो । खार्तुमस्थित अमेरिकी दूतावास र साउदी विदेश मन्त्रालयले संयुक्त विज्ञप्तिमा भनेको छ । युद्धविराम खार्तुमको समय अनुसार आइतबार बिहान ६ बजे सुरु हुने विज्ञप्तिमा भनिएको छ ।
दुई समूहहरू सैन्य हमलाहरूबाट टाढा रहन र ’मानवीय सहायताको निर्बाध आवतजावत र वितरण’ लाई अनुमति दिन सहमत भए । विज्ञप्तिमा भनिएको छ, “पक्षहरू युद्धविरामको अवधिमा प्रतिबन्धित आन्दोलन, आक्रमण, सैन्य विमान वा ड्रोनको प्रयोग, तोपखाला आक्रमण, स्थितिको सुदृढीकरण र सेनाको पुनः आपूर्तिबाट अलग रहने र युद्धविरामको अवधिमा सैन्य फाइदा लिनबाट टाढा रहने सहमति जनाएका छन्।“ यता युगाण्डामा इस्लामिक स्टेट (आईएस)को बर्बरता बढेको छ ।
आईएस समूहसँग सम्बन्धित लडाकू समूहले एक विद्यालयमा गरेको आक्रमणमा कम्तीमा ४० जनाको मृत्यु भएको छ । आक्रमणलाई युगाण्डाका सेना र प्रहरी अधिकारीले एक दशकयताकै सबैभन्दा ठूलो आक्रमण गरी अधिकांश विद्यार्थीसहित दर्जनौंको हत्या गरेको शनिबार बताएका छन् ।
डेमोक्रेटिक रिपब्लिक अफ कङ्गो नजिकैको कासेसे जिल्लाको एमपोन्ड्वेमा रहेको एक माध्यमिक विद्यालयमा स्थानीय समयअनुसार शुक्रबार राति सीमापारीबाट आएर गरेको आक्रमणपछि सेनाले एलाइड डेमोक्रेटिक फोर्सेस (एडीएफ)का लडाकूहरूलाई पछ्याइरहेको बताएको छ ।
अनुसन्धानकर्ताहरूले प्रजातान्त्रिक गणतन्त्र कङ्गोको द्वन्द्वग्रस्त पूर्वी क्षेत्रमा सक्रिय सबैभन्दा घातक समूहमध्ये एक एडीएफले राति अबेरसम्म गरेको निर्मम आक्रमणमा छात्रावासमा आगजनी गरेको र विद्यार्थीलाई धारिलो हतियार प्रयोग गरी हत्या गरेको बताएका छन् ।
युगान्डा पिपुल्स डिफेन्स फोर्सेज (यूपीडीएफ)का प्रवक्ता फेलिक्स कुलाइगीले एक विज्ञप्ति जारी गर्दै भने, “दुर्भाग्यवश ३७ जनाको शव फेला परेको छ र उनीहरूलाई ब्वेरा अस्पतालको शवगृहमा पठाइएको छ । आठजना घाइते भएका छन् भने अन्य ६ जनालाई आक्रमणकारीले अपहरण गरी कङ्गोको सीमामा रहेको भिरुङ्गा राष्ट्रिय निकुञ्जतर्फ लगेका छन् ।
यूपीडीएफले अपहरणमा परेका विद्यार्थीहरूलाई बचाउन अपराधीहरूको खोजी सुरू गरेको जनाएको छ । कासेसका लागि आवासीय आयुक्त जो वालुसिम्बीले एएफपीलाई बताएअनुसार मृतकमध्ये कम्तीमा २५ जना विद्यालयका विद्यार्थी भएको पुष्टि भएको छ । सन् २०१० मा कम्पालामा भएको दुईवटा बम विष्फोटमा सोमालियामा पूभाव रहेको अल–शबाब समूहले गरेको आक्रमणमा ७६ जनाको मृत्यु भएपछि युगान्डामा भएको यो सबैभन्दा घातक आक्रमण हो ।
