२९ असार,एजेन्सी ।
छिमेकी राष्ट्र भारतका प्रधानमन्त्री नरेन्द्र मोदी दुई साता अघिको अमेरिका तथा मध्यपूर्वी राष्ट्रको भ्रमणपछि अहिले फ्रान्स भ्रमणमा छन् । यही भ्रमणका क्रममा विश्वकै उदाउदो अर्थतन्त्र भएको भारतका प्रधानमन्त्री मोदीलाई फ्रान्सले देशको सर्वोच्च नागरिक र सैन्य सम्मान ग्रान्ड क्रस अफ द लिजन अफ अनर प्रदान गरेको छ ।
राष्ट्रपति इमानुएल म्याक्रोनले बिहीबार साँझ पेरिसको एलिसी प्यालेसमा एक निजी रात्रिभोजमा मोदीलाई अवार्ड प्रदान गरेका हुन् । अवार्डका बारेमा भारतको विदेश मन्त्रालयले भनेको छ, ’भारतीय जनताको तर्फबाट यो अनौठो सम्मानका लागि धन्यवाद।
’ विदेश मन्त्रालयका प्रवक्ता अरिन्दम बागचीले सम्मानलाई भारत–फ्रान्स साझेदारीको भावनाको न्यानो प्रतीकको रूपमा वर्णन गरेका छन् । यस्तै सम्मानमा लागि मोदीले पनि फ्रान्सेली राष्ट्रपति र जनताप्रति आभार ब्यक्त गरेका छन् , उनले लेखेका छन्, यो ठूलो नम्रताका साथ म लिजन अफ अनरको ग्रान्ड क्रस स्वीकार गर्दछु। यो भारतका १४० करोड जनताका लागि सम्मान हो। म राष्ट्रपतिलाई धन्यवाद दिन्छु ।
फ्रान्सबाट यो सम्मान पाउने नरेन्द्र मोदी पहिलो भारतीय प्रधानमन्त्री हुन् । फ्रान्सले यसअघि यो सम्मान दक्षिण अफ्रिकाका पूर्व राष्ट्रपति नेल्सन मण्डेला, पूर्व जर्मन चान्सलर एन्जेला मर्केल र संयुक्त राष्ट्रका पूर्व महासचिव बुट्रोस बुट्रोस–घालीलाई प्रदान गरेको थियो ।
यसअघि जुनमा इजिप्टले मोदीलाई अर्डर अफ द नाइलले सम्मान गरेको थियो। मोदीले बिहीबार आफ्ना फ्रान्सेली समकक्षी एलिजाबेथ बोर्न र सिनेटका अध्यक्ष जेरार्ड लार्चरसँग भेटघाट गरेका थिए । मोदीलाई विमानस्थलमा स्वागत गर्न फ्रान्सका प्रधानमन्त्री बोर्न नै पुगेका थिए । उनलाई ’गार्ड अफ अनर’ पनि दिइएको थियो ।
मोदी राष्ट्रिय दिवस समारोहमा विशेष अतिथिका रूपमा सहभागी हुने फ्रान्स पुगेका हुन् । दिवस समारोहमा भाग लिन २६९ जनाको भारतीय सेनाको टोली पनि फ्रान्स पुगेको भारतीय संचारमाध्यामहरुले उल्लेख गरेका छन् । त्याहा भारतीय वायुसेनाका तीन राफेल लडाकु विमान पनि सहभागी हुनेछन्।
