७ असोज, एजेन्सी ।
संसारकै सबैभन्दा पूरानो बेलायती राजसंस्थाविरुद्ध राजदरबार भित्रै प्रर्दशन गरिएको छ । राजतन्त्रविरोधी अभियन्ताहरूले शनिबार बेलायतको बकिङह्याम दरबारभित्र प्रदर्शन गरेका छन् । उनीहरूले यसलाई दरबारभित्रै गरिएको पहिलो प्रदर्शन बताएका छन् । बेलायतको सबैभन्दा ठूलो राजतन्त्रविरोधी समूह ‘रिपब्लिक’ ले एक विज्ञप्ति जारी गर्दै भनेको छ, ‘बेलायतका विभिन्न भागबाट आएका अभियन्ताहरूको एक समूह पर्यटकका रूपमा प्रवेश गरेका थिए ।
उनीहरूले ग्रान्ड हलमा उभिएर प्रदर्शन गरेका छन् ।’ समूहले एक तस्बिर सार्वजनिक गरेको छ जसमा प्रदर्शनकारीहरू दरबारभित्र ‘नट माई किङ’ (मेरो राजा होइन) लेखेको टी–सर्ट लगाएर उभिएको देखिएको छ । राजतन्त्रको भविष्यबारेको बहस अघि बढाउन चालिएका शृङ्खलाबद्ध कदमको यो एक हिस्सा भएको रिपब्लिकले बताएको छ ।
प्रदर्शन सुरु गरे लगत्तै समूहका ६ जनालाई सुरक्षाकर्मीले नियन्त्रणमा लिएको थियो । केही समयपछि उनीहरूलाई गेटबाट बाहिर लगिएको थियो । यता, बकिङह्याम दरबारले भने सुरक्षाको विषयमा आफूहरूले कुनै प्रतिक्रिया नदिने बताएको छ । यो समूहले यो वर्षको सुरुवातमा राजा चार्ल्सको राज्याभिषेकका दौरान पनि प्रदर्शन गरेको थियो ।
अब अर्को प्रदर्शन संसद् भवन अघि गर्ने उनीहरूको तयारी रहेको छ । महारानी एजिजावेथ द्धितीयको निधनका समयमा समेत राजा चाल्र्सलाई लिएर राजसंस्थाविरुद्ध आवाज बेलायतका विभिन्न स्थानमा आवाज उठेको थियो । ९६ वर्षीया महारानीको स्कटल्यान्डको बालमोरल दरबारमा निधन भएपछि उनका जेठा छोरा चार्ल्स राजा चार्ल्स तृतीय बनेका छन् र उनी १४ वटा राष्ट्रमण्डलका देशहरूको राष्ट्रप्रमुख पनि बनेका छन्।
उनी विभिन्न विवादका कारण आलोचित समेत बनेका थिए । राजकुमार रहदा चाल्र्सले ओसामा बिन लादेनका परिवारबाट लाखौ रकम अनुदान लिएको खुलासा भएको थियो । उनले लादेनका सौतेनी भाइहरू बकर र शफिक बिन लादेन नामक दुई व्यक्तिबाट दश लाख पाउन्ड अर्थात करिब १२ लाख अमेरिकी डलर अनुदान लिएको खुलासा भएको थियो ।
यस्तै चार्ल्सले कतारका पूर्व प्रधानमन्त्री शेख हमाद बिन जसिम बिन ज्याबेर अल थानीबाट ३० लाख अमेरिकी डलर बराबरको नगद स्वीकार गरेको खबरले पनि उनको आलोचना भएको थियो । राजकुमार ह्यारीले राजदरबार त्याग गरेपछि पनि बेलायतमा राजसंस्थाका विषयमा वहस छेडिएको थियो ।
