बागलुङ, भदौ २३
जैमिनी नगरपालिका–७ जैदीका वडासदस्य केन्द्र रसाइलीले जीवनभर राज्यको कुनै सुविधा नलिने घोषणा गरेका छन् ।
उनले यो वर्ष वडाबाट पाएको तलब, भत्ता पनि सामाजिक काममा खर्च गरे । “मैले राज्यको पैसाबाट पानी पनि खान्न” उनले भने, “जस्तोसुकै अवस्था आए पनि सुविधा लिन्न ।”
रसाइलीले आफूले पाएको तलब रु ८४ हजार ५४ बाट शुक्रबार जैदीकै संस्कृत माविलाई विज्ञान विषयका प्रयोगात्मक सामग्री प्रदान गरे । उनले गत जेठमा वडाबाट पाएको रु. १६ हजार भत्ताबाट गाउँकै जनता बाल सारक्षता आधारभूत विद्यालयका विद्यार्थीलाई शैक्षिक सामग्री वितरण गरेका थिए ।
“बाँकी चार वर्षसम्मको कार्यकालमा शिक्षा र स्वास्थ्य क्षेत्रमा सहयोग गर्छु”, उनले भने । जनप्रतिनिधि नहँुदा पनि राजनीतिलाई सेवाको रुपमा अघि बढाउने उनको सङ्कल्प छ ।
जैमिनी नगरपालिकाका प्रमुख इन्द्रराज पौडेलले वडासदस्य रसाइलीले उदाहरणीय कार्य गरेको बताए ।
रासस
