Nepal Times
Nepal Times
3
Shares

नेपाली टिमलाई प्रधानमन्त्रीले बधाई दिएपछिको प्रश्नः ५ लाख खोई ?

नेपाली टिमलाई प्रधानमन्त्रीले बधाई दिएपछिको प्रश्नः ५ लाख खोई ?

१७ कार्तिक,काठमाण्डौ ।

नेपाल आईसीसी टी–२० विश्वकप प्रतियोगिताका लागि छनोट भएपछि प्रधानमन्त्री मनत्री सहित शीर्ष दलका शीर्ष नेताहरुले नेपाली टिमलाई बधार्य दिएका छन् । शुक्रबार मुलपानी क्रिकेट मैदानमा भएको सेमिफाइनल खेलमा यूएईलाई ८ विकेटले हराउँदै नेपाल विश्वकपमा छनोट भएको छ । यो खुशी नेताहरुले सामाजिक संजालमार्फत साटेका छन् ।

प्रधानमन्त्री पुष्पकमल दाहाल प्रचण्डले टी–२० विश्वकप प्रतियोगिताका लागि छनोट भएकोमा नेपाली क्रिकेट टोलीलाई हार्दिक बधाइ ज्ञापन गर्दछु भन्दै लेखेका छन् । पछिल्लो समय क्रिकेटमा नेपाली टोलीले प्राप्त गरेको सफलता र उचाइप्रति नेपाल सरकारको तर्फबाट उच्च सम्मान व्यक्त गर्दछु। साथै नेपाली टोलीको आगामी यात्रामा सफलताको कामनासहित सरकार सधै यहाँहरूको साथमा रहने प्रतिवद्धता व्यक्त गर्दछु।

उनको यो शुभकामनामा अधिकांश सामाजिक संजाल प्रयोगकर्ताहरुले ५ लाख खोई भन्ने प्रश्न सोधेका छन् । सरकारले यसअघि नै खेलाडीहरुलाई एसिया कप खेल्नु अघि नै पुरस्कार रकम दिने बताएपनि अहिलेसम्म वितरण गर्न सकेको छैन् । यस्तै नेकपा एमालेका अध्यक्ष केपी शर्मा ओलीले निरन्तर कोसिसपछिको जित ! बधाई टीम नेपाल ! अबको यात्रा विश्वकप भन्दै बधाई दिएका छन् ।

सामाजिक संजालमा नेकपा एकीकृत समाजवादीका अध्यक्ष तथा पूर्व प्रधानमन्त्री माधवकुमार नेपालले टि २० विश्वकप क्रिकेट प्रतियोतिमा पुग्न सफल भएकोमा नेपाली क्रिकेट टिमलाई हार्दिक बधाई भन्दै आगामी प्रतियोगिताहरुमा समेत सफलताको कामना ! गरेका छन् । यस्तै एसिया क्षेत्र छनोटमा सफलता हासिल गरेकोमा सभामुख देवराज घिमिरेले बधाई तथा शुभकामना दिएका छन्।

उनले भनेका छन्, ‘ट्वान्टी–२० विश्वकप छनोट एसिया क्षेत्रको सेमिफाइनलमा यूएईलाई हराउँदै नेपाल ट्वान्टी–२० विश्वकपमा प्रवेश गरेकोमा नेपाली टिमलाई बधाई।’ यसैगरी नेपाली काग्रेसका महामन्त्री गगन थापाले दश वर्ष पछि फर्किएको खुसी, हामी फेरि विश्वकपमा भन्दैनेपाली राष्ट्रिय क्रिकेट टिमलाई बधाई तथा धन्यवाद! दिएका छन् ।

नेपाली टिम विश्वकपमा छनोट हुँदा काठमाडौं महानगरका मेयर बालेन्द्र शाहले पनि खुशी साँटेका छन् । उनले जय नेपाल भन्दै याहु, वे टु वल्र्डकप भन्दै राष्ट्रिय टिमको तस्विर शेयर गरेका छन् । बालेनले श्रीलंकामा एसिया कपमा नेपालको खेल हेरेपछि काठमाडौंमा स्टेडियम बनाउन महानगरले पहल गर्ने भन्दै आवश्यक जग्गा उपलब्ध गराउनलाई सरकारसँग माग गरेका थिए ।

तर एसिया कप सकिएको लामो समय भएपनि दुवै पक्षबाट आवश्यक पहल अघि बढेको छैन् । नेता र नेतृत्वका यी त प्रतिनिधि बधाई र शुभकामना हुन् । यस्ता शुभकामना धेरै नेता र नेतृत्वले ब्यक्त गरेका छन् । नेपाल १० वर्षपछि विश्वकप पुगेपछि हर कोही खुशी छ । समग्र खेल क्षेत्र उत्सव मनाइरहेको छ।

यो खुशीको क्षणमा आफ्ना अभिब्यक्ति ब्यक्त गर्नु सामान्य विषय हो । तर नेता र नेतृत्वले क्रिकेटको पूर्वाधारका लागि यतिलामो समयदेखि ध्यान नदिनु चाँही दुखको विषय हो । यसैले त स्थान अभाव र निर्माणकार्य सम्पन्न भईनसकेको मुलपानी क्रिकेट मैदानमा विना भीआइपी संचालन भएको खेलमा नेपालको हात पारेको ८ विकेटको जितले नेता र नेतृत्वको शुभकामनालाई गिज्जाईरहेको थियो ।

पूर्वाधार अभावलाई मध्यनजर गरेरै क्रिकेट संघले सार्वजनिक सूचना जारी गरेर ३५ सय भन्दा बढी टिकट नबेच्ने भन्दै घरमै बसेर क्रिकेट हेर्न अपिल गरेको थियो ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.