१२ मंसिर,एजेन्सी ।
इजरायल र हमासबीच बन्दी साटासाटका लागि मानविय युद्धविराम जारी रहेकाबेला विश्वका धनाढ्य तथा टेस्ला, एक्स लगायतका मालिक एलन मस्क इजरायल पुगेका छन् । सोमबार उनले त्यहाँ प्रधानमन्त्री बेन्जामिन नेतान्याहुसँग अक्टोबर ७ मा हमास लडाकुले आक्रमण गरेको ठाउँको भ्रमण गरेका छन् ।
इजरायली प्रधानमन्त्रीको एक्स ह्यान्डलबाट मस्कको इजरायल भ्रमणबारे जानकारी दिइएको छ । समाचारअनुसार मस्कले प्रधानमन्त्री नेतन्याहुसँग आज बिहान ‘काफर अजा’ नामक किबुत्ज भ्रमण गरे । प्रधानमन्त्रीले शनिबार अक्टोबार ७ मा भएको नरसंहारको बर्बरता देखाए ।
मस्कलाई आक्रमणमा प्रयोग गरिएका गोली, आक्रमणमा ध्वस्त भएका घर, भित्तामा गोलीका निशान, चारैतिर छरिएका वस्तु देखाइएको थियो । युद्धको सुरुवातमा मस्कले गाजामा इन्टरनेट सेवा उपलब्ध गराउने अभिब्यक्ति दिएपछि इजरेल चिढिएको थियो ।
यसैबीच प्यालेस्टाइनी राष्ट्रपतिले सोमबार इजरायली अर्थमन्त्री बेजलेल स्मोट्रिचको प्यालेस्टाइन क्षेत्रमा बसोबासलाई सुदृढ पार्न थप बजेट विनियोजन गर्ने योजनाको निन्दा गरेका छन् । राष्ट्रपतिका प्रवक्ता नबिल अबु रुदेनेहले विज्ञप्ति जारी गर्दै स्मोट्रिचले हालको बजेटमा बस्ती विस्तार गर्न लाखौं शेकेल विनियोजन गर्ने प्रस्ताव गरेका बताएका छन् ।
इजरायली मन्त्रिपरिषद्ले गाजा पट्टीमा हमाससँगको द्वन्द्वका कारण सन् २०२३ बजेटमा परिवर्तन बारे छलफल गरेको र स्मोट्रिचले बस्ती विकासको लागि ३०० मिलियन शेकेलभन्दा बढी कोष विनियोजनको प्रस्ताव गरेका टाइम्स अफ इजरायलले उल्लेख गरेको छ ।
इजरायलले प्यालेस्टिनीहरूबाट कर राजस्व रोक्ने र गाजा र वेस्ट बैंकमा युद्ध गरिरहेको बेला यो प्रस्ताव आएको अबु रुदेनेहले बताएका छन् । उनले इजरायली योजनाले सो क्षेत्रको सुरक्षा र स्थायित्वमा पर्न सक्ने खतरनाक प्रभावहरू विरुद्ध चेतावनी दिएका छन्। उनले इजरायली सरकारलाई योजना कार्यान्वयन नगर्न र इजरायलले राखेको प्यालेस्टाइनी कोष जारी नगर्न दबाब दिन आग्रह गरेका छन् ।
