१८ मंसिर, एजेन्सी ।
भारतीय वायुसेनाको विमान दुर्घटना हुँदा दुई जना पाइलटको मृत्यु भएको छ । दुई जना भारतीय वायुसेना (आईएएफ) पाइलटहरू सवार पिलाटस ट्रेनर विमान सोमबार बिहान तेलङ्गानाको मेडक जिल्लाको टुप्रन शहरमा दुर्घटनाग्रस्त भएको आईएएफ अधिकारीहरूले जनाएका छन् ।
अधिकारीहरुका अनुसार डिन्डिगुल जिल्ला नजिकै एयर फोर्स एकेडेमीमा तालिमका क्रममा बिहान ८ः५५ बजे सो दुर्घटना भएको हो । पाइलटहरूमा एक जना प्रशिक्षक र अर्का क्याडेट हुन् । एसपी रोहिणीले दिएको जानकारी अनुसार ’यो डन्डिगुल ट्रेनिङ एयरक्राफ्ट हो।
विमानभित्र दुई जना सवार थिए, तिनमा एक जना ट्रेनर र अर्का प्रशिक्षार्थी थिए । विमानस्थलका कर्मचारी र क्लु टोली घटनास्थल पुगेका छन्। दमकलले आगो निभाइरहेको छ।’ दुर्घटनाबारे अनुसन्धान जारी छ । यसअघि ६ महिना पहिला पनि १ जुनमा कर्नाटकको चामराजनगर क्षेत्रमा वायु सेनाको एक विमान दुर्घटनामा परेको थियो । सो बेला भने विमानमा सवार दुवै जना पाइलट भाग्यले बाँचेका थिए ।
