Nepal Times
Nepal Times
3
Shares

इजरायल र हमासबीच फेरि युद्धविराम हुनसक्छ ?

इजरायल र हमासबीच फेरि युद्धविराम हुनसक्छ ?

२५ मंसिर,एजेन्सी ।
कतारका प्रधानमन्त्री शेख मोहम्मद बिन अब्दुल रहमान अल थानीले इजरायल र हमासबीच फेरि युद्धविरामका लागि प्रयास भइरहेको बताएका छन् । उनले गाजा क्षेत्रमा नयाँ युद्धविराम र हमासको कब्जामा रहेका बन्धकहरूलाई मुक्त गर्न मध्यस्थताको प्रयास जारी रहेको बताएका हुन् ।

तर, लगातारको बमबारीको घटनाले जटिलता ल्याएको पनि उनी बताउँछन् । यसअघि कतारकै प्रयासमा इजरायल र हमासबीच सात दिनको अस्थायी युद्धविराम भएको थियो । तर सो युद्धविराम सकिएपछि गाजामा इजरायलले आक्रमण झनै तिब्र बनाएको छ । उसले आफू लक्ष्यनजिक पुगेको समेत दाबी गरेको छ ।

यस्तो बेला कतारले फेरि युद्धविराम हुनसक्ने संकेत गरेको हो । तर यसबीच इजरायलले हमास कमाण्डरलाई मारेको जनाएको छ । इजरायली सेनाले सोमबार एक्सको एक पोस्टमा हमासको शेजैया बटालियनका कमाण्डर इमाद क्रिकाईलाई मारेको घोषणा गरेको हो ।

तर, इजरायली सेनाले सो मृत्युका बारेमा थप जानकारी दिएको छैन । सो पोस्टका अनुसार ती बटालियन कमाण्डरले अघिल्लो कमाण्डरको मृत्युपछि उनको भूमिका ग्रहण गर्नुअघि क्रिकाईमा अर्थात पहिले गाजा सहर ब्रिगेडमा एन्टी ट्याङ्क मिसाइल प्रशिक्षणको लागि जिम्मेवार थिए ।

गाजामा इजरायली आक्रमणबाट मारिनेको संख्या १८ हजार पुगेको छ । आइतबार साँझसम्म १८ हजार जनाको मृत्यु पुष्टि भएको अल्जजिराले जनाएको छ । अक्टोबर ७ यता गाजामा झन्डै ५० हजारजना घाइते भएका छन् ।

बितेको २४ घण्टामा मात्र २९७ जना मारिएका छन् भने ५५० जना घाइते भएका छन् । नौ हप्ताअघि अक्टोबर ७ मा हमासले इजरायलमा आक्रमण गरेको थियो । जसमा १२ सय जना मारिएका थिए । हमासले २४० जनालाई बन्दी बनाएको थियो । जसमध्ये केही रिहा भइसकेका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.