२८ मंसिर,एजेन्सी ।
यूईएफए च्याम्पियन्स लिगको राउण्ड १६ को समीकरण पूरा भएको छ । समूह चरणका खेलहरु गएराति सकिएसँगै राउण्ड १६ मा पुग्ने १६ क्लबको टुंगो लागेको हो । राउण्ड १६ मा समुह ए बाट बायर्न म्युनिख र कोपेनहेगन, समूह बिबाट आर्सनल र पीएसभी, समूह सीबाट रियल मड्रिड र नापोली, समूह डी बाट रियल सोसियडाड र इन्टर मिलान, समूह ई बाट एथलेटिको म्याड्रिड र लाजियो, समूह एफ बाट डोर्टमण्ड र पिएसजी, समूह जी बाट म्यानचेस्टर सिटी र आरबी लेइपजिंग तथा समूह एचबाट बार्सिलोना र पोर्टो पुगेका छन् ।
यद्यपी अन्तिम १६ मा पुगिसकेको भएपछि बार्सिलोना गएराति बेल्जियन टोली रोयल एन्टवर्पसँग भने पराजित भयो।एन्टवर्पको घरेलु मैदानमा भएको खेलमा बार्सिलोना ३–२ ले हारेको छ । हारका बावजूद बार्सिलोना समूहको शीर्ष स्थानमा रह्यो । बार्सिलोनाको ६ खेलमा १२ अंक छ । दोस्रो स्थानमा रहेको पोर्टोको पनि १२ अंक नै रहेको छ ।
सबै समूहबाट तेस्रो भएका क्लबहरु युरोपा लिगमा ट्रान्सफर भएका छन् । जसमा समूह ए बाट गालाटासारे, समूह बी बाट लेन्स, समुह सी बाट ब्रागा, समुह डी बाट बेनिफिका, समुह ई बाट फेयनोर्ड, समुह एफ बाट एसी मिलान, समूह जी बाट योंग ब्य्वाज र समूह एचबाट शख्तर डोनेटस्क रहेका छन् । अब राउण्ड १६ को ड्र डिसेम्बर १८ मा हुने छ भने राउण्ड १६ का खेलहरु फेब्रुअरी र मार्चमा हुने छन्।
