Nepal Times
Nepal Times
2.06k
Shares

एनएसएलको पुरस्कार राशि दोब्बरले बढ्यो

एनएसएलको पुरस्कार राशि दोब्बरले बढ्यो

१२ पुष ,काठमाडौँ ।
नेपाल सुपर लिग (एनएसएल)को पुरस्कार रकम अघिल्लो संस्करणमा भन्दा दोब्बरले बढेको छ । अघिल्लो संस्करणमा च्याम्पियन काठमाडौं रेजर्सले ३५ लाख रुपैयाँ पाएकोमा यो संस्करणमा च्याम्पियन हुने टोलीले ७० लाख पाउने आयोजक नेपाल स्पोर्ट्स म्यानेजमेन्टले जनाएको छ ।

लिगको पूर्वसंध्यामा आयोजित पत्रकार सम्मेलनमा म्यानेजमेन्टका मेनेजिङ डाइरेक्टर श्रेयांश कार्कीले पुरस्कार रकम बढ्ने भए पनि यतिनै हुने भनेर निर्क्योल भइनसकेको बताएका थिए । जारी लिगमा आज दोस्रो क्वालिफायर्समा पोखरा थण्डर्स र ललितपुर सिटी भिड्दैछन् । खेल बेलुका साढे ५ बजे दशरथ रङ्गशालामा शुरु हुनेछ ।

आजको विजेता टोलीले फाइनलमा धनगढी एफसीसँग उपाधिका लागि पर्सि शनिवार खेल्नेछ । अस्ति मङ्गलवार भएको इलिमिनेटरमा काठमाण्डौ रेजर्सलाई ३–० गोलले हराउँदै ललितपुर फाइनल नजिक पुगेको हो । पोखरा पहिलो क्वालिफायरमा धनगढी एफसीसँग पेनाल्टी सुटआउटमा पराजित भएको थियो । उसले दोस्रो क्वालिफायर खेल्ने मौका पाएको हो ।

जारी लिगको उपविजेता हुने टोलीले २० लाख रुपैयाँ प्राप्त गर्नेछ । आयोजकले प्रतियोगिताको भ्यालुएबल खेलाडी बन्दै ‘गोल्डेन बल’ जित्ने खेलाडीले २ लाख रुपैयाँ पाउने बताएको छ । त्यस्तै, ‘गोल्डेन बुट’ जित्ने शीर्ष गोलकर्ता, ‘गोल्डेन ग्लभ्स’ पाउने उत्कृष्ट गोलकिपर र इमर्जिङ प्लेयरले १÷१ लाख रुपैयाँ प्राप्त गर्नेछन् ।

नेपाल स्पोर्ट्स म्यानेजमेन्टकी अध्यक्ष आश्रयता कार्की चौधरीले आगामी संस्करणमा पुरस्कार रकम अझै बढाएर लैजाने बताएकी छन् । एनएसएलको दोस्रो संस्करणले नयाँ च्याम्पियन पाउने पक्का भएको छ । साविक विजेता काठमाडौं रेजर्स एलिमिनेटर बाट बाहिरिएसँगै एनएसएलमा यसपटक नयाँ टोलीले उपाधि उचाल्ने निश्चित भएको हो ।

दशरथ रंगशालामा जारी एनएसएसलमा ललितपुर सिटी एफसी विरुद्ध मंगलबार ३–० ले पराजित भए सँगै काठमाडौंको उपाधि यात्रामा पूर्णविराम लागेको हो । लिग चरणको अन्तिम खेलमा ललितपुर विरुद्ध नै १–० को जित निकाल्दै प्लेअफमा स्थान बनाएको काठमाडौंको बाहिरिएपछि अब ३ टोली उपाधि दौडमा बाँकी रहेका छन् ।

पहिलो क्वालिफायरमा सोमबार पोखरा थन्डर्सलाई टाईब्रेकरमा ४–३ ले हराउँदै धनगढी एफसीले फाइनलमा पुगेको थियो । यसपटक उपाधि दौडमा बाँकी रहेका ३ टोली मध्ये धनगढीसँग मात्र एनएसएलको फाइनल खेलेको अनुभव छ । पहिलो संस्करणमा पनि पहिलो क्वालिफाइयर जित्दै फाइनल पुगेको धनगढी फाइनलमा पराजित भएको थियो ।

पोखरा र ललितपुरबीचको खेलको निर्णय पहिलो पटक बिहीबारको जित हारमा हुनेछ । यसअघि दुबै भेटमा यि दुईले अंक बाँडेका थिए । लिग चरणमा यसपटक र सन् २०२१ को पहिलो संस्करणमा पनि पोखरा र ललितपुरले गोलरहित बराबरी खेलेका थिए ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.