२० पुष,एजेन्सी ।
संयुक्त राष्ट्रसंघसहित युरोपेली राष्ट्रको कठोर प्रतिबन्धका बीच आधुनिक परमाणु शस्त्र अस्त्रको विकास गरिरहेको उत्तर कोरियाका शासक किम जङ–उनकी छोरी किम जुए उनका ‘सम्भावित उत्तराधिकारी’ भएको दक्षिण कोरियाली गुप्तचर निकायले जनाएको छ। दक्षिण कोरियाको गुप्तचर निकाय ‘नेसनल इन्टेलिजन्स सर्भिस’ले उत्तर कोरियाली नेता किमका उत्तराधिकारी किम जुए हुने खुलासा गरेको हो।
किम जुए सन् २०२२ को अन्त्यतिर पहिलोपटक सार्वजनिक समारोहमा देखापरेकी थिइन्। त्यसयता उनी चर्चामा छिन्। नेसनल इन्टेलिजन्स सर्भिसले भनेको छ, ‘पहिलोपटक सार्वजनिक कार्यक्रममा उपस्थित भएपछि किम जुएका सार्वजनिक गतिविधि र उनले प्राप्त गरेका सम्मानको विस्तृत विश्लेषणका आधारमा अहिले उनी सबैभन्दा सम्भावित उत्तराधिकारी हुन्।’ ‘तर हामी सबै सम्भावना नियाल्दै छौँ किनभने किम जङ उन अझै युवा छन्, उनको स्वास्थ्यमा ठूलो समस्या छैन र अरू धेरै परिवर्तनशील कुरा छन्।’
किम जुए उत्तर कोरियाका शासककी माहिली छोरी हुन्। द न्युयोर्क टाइम्सका अनुसार उत्तर कोरियाले किमकी छोरीको नाम र उमेर लगायतका कुनै पनि व्यक्तिगत विवरण खुलाएको छैन। तर दक्षिण कोरियाली अधिकारीहरूले उनलाई किम जु–ए भनेर चिनाएका छन् र उनी लगभग १० वर्षकी भएको बताएको छ। ‘अहिलेसम्म, किम जु–एलाई सबैभन्दा सम्भावित उत्तराधिकारीको रूपमा हेरिएको छ,’
दक्षिण कोरियाको मुख्य सरकारी जासूस एजेन्सी राष्ट्रिय खुफिया एजेन्सीले राष्ट्रिय सभाका सदस्य मार्फत बिहीबार जारी गरेको मूल्याङ्कनमा भनेको छ।दक्षिण कोरियाली अधिकारीहरूका अनुसार जु–ए भन्दा सानो किमको अर्को सन्तान थियो। उनीहरूले गोप्य सूचनाको हवाला दिँदै किमको जु–ए भन्दा ठूलो छोरा पनि हुन सक्छ भनेका छन्।
तर हालसम्म सार्वजनिक रूपमा देखा परेको किमको एक मात्र सन्तान जु–ए हुन्। उत्तर कोरियाको सरकारी मिडियाले उनलाई किमको ‘सबैभन्दा प्यारो’ वा ‘सम्मानित’ सन्तानका रूपमा उल्लेख गरेको छ र सैन्य जनरल र अन्य उच्चस्तरीय अधिकारीहरूले उनको अगाडि घुँडा टेकेको देखाएको छ।
किमका हजुरबुबा किम इल सुङ र बुबा किम जोङ इल दुवैले आफ्नो मृत्यु नभएसम्म शासन गरे। किम जोङ उनले सन् २०११ मा आफ्ना बुबा किम जोङ–इलको मृत्युपछि पदभार ग्रहण गरेका थिए। गोप्यतामा लुकाइएको किम परिवारमा उत्तराधिकारी को हुन्छ भनी अनुमान गर्न धेरै गाह्रो हुन्छ।
धेरै बाहिरका विश्लेषकहरूले लामो समयदेखि किम जोङ–उनका दुई दाजुहरूमध्ये एकले आफ्नो बुबाको स्थान लिनेछन् भनेर अनुमान गरेका थिए। तर उत्तर कोरियाले २००८ मा किम जोङ–इललाई स्ट्रोक भएपछि एक्कासी किम जोङ उनलाई उत्तराधिकारी भनेर घोषणा गरेको थियो। जु–एले किम पछि शासन गरिन् भने उनी पुरुष प्रधान उत्तर कोरियाको पहिलो महिला शासक बन्नेछिन् ।
केही समयअगाडि मात्र अमेरिका र दक्षिण कोरियाले उत्तर कोरियाली सर्वोच्च नेता किम जोङ उनको शासन समाप्त गर्नेबारे योजना बनाइरहेको खबर बाहिरियो । यसअघि सन् २०१७ मा उत्तर कोरियाको सरकारले अमेरिकाको गुप्तचर संस्था सीआईएको मद्दतमा सर्वोच्च नेता किमलाई विष दिएर हत्या गर्ने योजना अमेरिका र दक्षिण कोरियाले बनाएको भन्दै अभिव्यक्ति नै दिएको थियो ।
