२६ पुष,एजेन्सी ।
हामीले विभिन्न चलचित्रमा हेर्दै आएको चोरीको घटनालाई स्मरण गराउने गरी भारतमा गुडिरहेको ट्रकबाट झन्डै १० करोड भारु अर्थात १६ करोड नेपाली रुपैयाँ बराबरको आइफोन चोरी भएको छ । पश्चिम बङ्गालमा गुडिरहेको ट्रकबाट चोरहरूले ९ करोड ७० लाख भारु मूल्य बराबरका १ हजार ५०० थान आइफोन चोरेका छन् ।
अमेरिकी बहुराष्ट्रिय प्रविधि कम्पनी एप्पल इंकको मोबाइलहरू बोकेर एउटा ट्रक चेन्नईबाट कलकत्ता गइरहेको थियो । पश्चिम बङ्गाल छिर्ने बित्तिकै ट्रकबाट मोबाइल चोरी भयो । चोरीको पूरा घटना सुनेर कलकत्ता उच्च अदालतका न्यायाधीश समेत छक्क परेको थियो । यस मामिलामा अर्को सुनुवाई फेब्रुअरी २ मा हुने बताइएको छ ।
यो घटना गएको वर्ष सेप्टेम्बर २८ को हो । चोरी गरिएका कयौँ फोन चोर बजारमा विक्री गरेर खरिदकर्ताले चलाउन समेत सुरु गरिसकेका थिए । आइफोन ओसार्ने ट्रकमा अत्याधुनिक जीपीएस सिष्टम लगाइएको थियो । ट्रक कुनै ठाउँमा पाँच मिनेटभन्दा बढी समय रोकिने बित्तिकै ट्रक सञ्चालक कम्पनीको कार्यालयमा यसबारे अलर्ट पुगिसक्थ्यो ।
सन् २०२३ को सेप्टेम्बर २८ को बिहान ६ बजे उक्त ट्रक पश्चिम मेदिनीपुर जिल्लाको नयाँ बजारमा एउटा पेट्रोल पम्पमा ५ मिनेटभन्दा बढी समय रोकियो । अलर्ट आएपछि ट्रक सञ्चालक कम्पनीले चालकलाई बारम्बार फोन गरे । तर फोन उठेन । ४५ मिनेटपछि कम्पनीले डेबरा प्रहरी थानामा यसबारे उजुरी दियो ।
प्रहरीले ट्रक बरामद गर्दा चालक वा सहचालक कोही भेटेनन् । ट्रकबाट सबै आइफोन गायब थिए । ट्रक कतै पनि लामो समय नरोकिएकोले आइफोन ट्रक गुडिरहेको बेलामा चोरी भएको ट्रान्सपोर्ट कम्पनीका वकिलको दाबी थियो । पश्चिम बङ्गाल छिर्ने बित्तिकै आइफोन बोकेको ट्रकलाई अर्को एउटा ट्रक लामो समयसम्म पिछा गरिरहेको थियो ।
सडकमा ट्रकहरु सँगसँगै गुडिरहेको बेलामा ट्रक चालकको मिलिमतोमा आइफोनलाई अर्को ट्रकमा सारिएको अनि चालक र सहचालक दुवैले ट्रक छोडेर भागेको बताइएको छ । यस मामिलामा प्रहरीले कसैलाई पनि नसमातेको र अनुशन्धानमा असहयोग गरेको भन्दै ट्रान्सपोर्ट कम्पनी उच्च अदालतमा पुगेको थियो ।
