विराटनगर,भदौ २६
झापामा एक कपडा व्यवसायीको अपहरणपछि हत्या भएको छ । कमल गाउँपालिका ६ मंगलबारे निवासी ३८ बर्षीय खेमराज पौडेलको अपहरणपछि हत्या भएको जिल्ला प्रहरी कार्यालय झापाका प्रहरी नायव उपरीक्षक जितेन्द्रकुमार बस्नेतले जानकारी दिए । उनका अनुसार पौडेललाई हत्या गरी फालिएको शव गौरीगञ्ज ६ बाह्सुद्दीस्थित धान खेत नजिकै नालामा आज विहान भेटिएको हो ।
मृतक पौडेलको घाँटी र टाउकोमा छुरा प्रहार गरिएको छ । घटनास्थलमा पौडेलको मे ७ प १९०४ नम्बरको मोटरसाइकल, मोवाइल फोन फेला परेको छ । प्रहरीले हत्या गरिएको आशंकामा गौरीगञ्ज निवासी सद्धाम हुसेनलाई पक्राउ गरेको छ । प्रहरीले दिएको जानकारी अनुसार सोमबार बेलुका मे ७ प १९०४ नम्बरको मोटरसाइकलमा सवार पौडेल र उनकी श्रीमती पसलको पैसा उठाउन गौरीगञ्ज बजार गएका थिए ।
सद्धामसँग पौडेलले ९० हजार रुपैयाँ उठाउन रहेको थियो । सोही रकम लिन उसँग गएको उनकी श्रीमतीले प्रहरीलाई बयान दिएकी छिन । सद्धामसंग गएका पौडेल अवेर रातीसम्म नफर्किएपछि उनी अपहरणमा परेको भनि श्रीमतीले प्रहरीमा उजुरी दिएकी थिइन ।
