६ फागुन ,एजेन्सी ।
नेपालका सीमा जोडिएका दुई छिमेकी शक्तिराष्ट्र भारत र चीनबीचको तिक्तता जगजाहेर नै छ । दिनहुँ जसो यी दुई मुलुकका सीमामा तनाव देखिने गरेको छ । यसबीच हालै जर्मनीमा जब भारतका विदेशमन्त्री जयशंकर र चिनियाँ विदेशमन्त्री वाङ यी आमने सामने भए,यसले धेरैको ध्यान खिचेको छ ।
जर्मनीको म्यूनिख सुरक्षा सम्मेलनका क्रममा सभाहल भित्रै दुई नेताबीच अनौपचारिक जम्काभेट भएको हो । जयशंकर र वाङसहितका नेताहरु यतिबेला म्यूनिखमा छन् । जहाँ फेब्रुअरी १६ देखि आजसम्म ६० औं म्यूनिख सुरक्षा सम्मेलन चलिरहेको छ । सम्मेलन अन्तर्गत नै शनिवार जयशंकर र वांग यीबीच संक्षिप्त वार्ता भएको हो ।
दुवै नेताहरुलाई त्यतिबेला संगै देखिएको हो जतिबेला वाङ यी मञ्चतर्फ गइरहेका थिए । जयशंकर भने मञ्चमा नै रहेका थिए । जयशंकरले गत महिनामात्रै आईआईएम मुंबईको एक कार्यक्रममा आफ्नो पुस्तक ’व्हाई भारत म्याटर्स’ का बारेमा भनेका थिए कि, वैश्विक राजनीति एक प्रतिस्पर्धात्मक खेल हो र चीनसंग भारत डराउन पर्दैैन ।
उनले सो बेला थप भनेका थिए, गुनासो गर्नुको साटो बेजिंगभन्दा राम्रो गर्न तर्फ ध्यान केन्द्रित गर्नुपर्छ । उनले भनेका थिए, चीन एक ’प्रमुख अर्थव्यवस्था’ भएको नाताले आफ्नो संसाधनहरुको प्रयोग गर्छ र प्रतिस्पर्धी राजनीतिको हिस्साको रुपमा चिजहरुलाई आफ्नो तवरले आकार दिने प्रयास गर्दछ ।
’चीन पनि एक छिमेकी मुलुक हो र कयौँ मामिलामा उ प्रतिस्पर्धी राजनीतिको हिस्साका रुपमा यसलाई प्रभावित गर्छ । मलाई लाग्दैन कि हामीले चीनसंग डराउनु पर्छ । मलाई लाग्छ कि हामीले भन्नु पर्छ कि ठीक छ, वैश्विक राजनीति एक प्रतिस्पर्धी खेल हो । तपाइँ आफ्नो गर्नुस र म आफ्नो गर्छु ।
एक महिनाअघिको उनको यो बयान पछि अहिले वाङ यीसंग भेट भएको हो । यसका साथै जयशंकरले शनिवार नर्वेका आफ्ना समकक्ष एस्पेन बर्थ ईडेसंग पनि छलफल गरे । उनी ’विश्व मित्रः ब्रिजिंग द डिभाइड’ को एक सत्रमा पनि सहभागी भए । जसलाई नयाँ दिल्ली स्थित थिंक ट्यांक अब्जर्भर रिसर्च फाउन्डेशन (ओआरएफ) द्वारा होस्ट गरिएको थियो ।
यस्तै चिनियाँ विदेशमन्त्रीले पनि शुक्रबार म्यूनिख सुरक्षा सम्मेलनका दौरान अमेरिकी विदेश मंत्री एन्टोनी ब्लिंकेनसंग स्पष्ट एवं रचनात्मक छलफल गरेको खबरहरुमा उल्लेख छ । अमेरिकी विदेश विभागका प्रवक्ता म्याथ्यू मिलरका अनुसार दुवै नेताहरुकाबीच द्विपक्षीय, क्षेत्रीय र वैश्विक मुद्दाहरुमा कुराकानी भएको हो ।
