१५ फागुन, काठमाण्डौ ।
नेपालका युवा ब्याटर कुशल मल्लले टी–२० क्रिकेट इतिहासमा बनाएको सर्वाधिक छिटो शतक प्रहार गर्ने रेकर्ड नामिबियाका खेलाडीले तोडिदिएका छन् । काठमाडौंमा जारी त्रिदेशीय सिरिजको आज नेपालसँगको खेलमा नामिबियाका जन निकोल लोफ्टी–इटनले कुशलको कीर्तिमान तोडेका हुन् । उनले नेपालविरुद्ध सर्वाधिक छिटो ३३ बलमा नै शतक पुरा गरेर विश्वकीर्तिमान बनाएका छन् ।
इटन टी–२० अन्तर्राष्ट्रिय क्रिकेटमा सबैभन्दा कम बलमा शतक पुरा गर्ने खेलाडी बनेका हुन्। उनले ८ छक्का र ११ चौका प्रहार गरेका छन्। नेपालका कुशल मल्लले ३४ बलमा शतक पुरा गरेर सबैभन्दा कम बलमा सतक बनाउने विश्व कीर्तिमान बनाएका थिए। मल्लले गत सेप्टेम्बर २७ तारिखमा मंगोलियाविरुद्ध उक्त सफलता प्राप्त गरेका थिए । करिब ५ महिनामै मल्लको कीर्तिमान तोडिएको हो ।
कुशल अघि टी–२० मा सर्वाधिक छिटो शतक ३५ बलमा थियो। भारतका रोहित शर्मा, दक्षिण अफ्रिकाका डेविड मिलर र चेकरिपब्लिकनका सुदेश विक्रमशेखरले समान ३५ बलमा शतक हानेका थिए। नेपालबाट भने २०१९ मा पारस खड्काले सिंगापुरविरुद्ध ४९ बलमा शतक पूरा गरेका थिए। टी–२० र कुनै पनि खेलमा सर्वाधिक छिटो शतक क्रिस गेलको नाममा छ।
गेलले २०१३ को आइपिएलमा बेंगलोरबाट पुणे वारियर्सविरुद्ध ३० बलमै शतक हानेका थिए। २०१८ मा भारतीय ब्याटर ऋषभ पन्तले दिल्लीबाट हिमाचल प्रदेशविरुद्ध ३२ बलमा शतक हानेका थिए। ओडीआईमा भने दक्षिण अफ्रिकाका एवि डिभिलियर्सको नाममा ३१ बलमा शतकको कीर्तिमान छ। त्रिकोणात्मक टी–२० अन्तर्राष्ट्रिय क्रिकेट शृंखलाअन्तर्गत त्रिवि क्रिकेट मैदानमा अहिले भइरहेको खेलमा नामिबियाले नेपाललाई २०७ रनको लक्ष्य दिएको छ।
