Nepal Times
Nepal Times
3.06k
Shares

रविले गृह नछाड्ने, माधवलाई ओलीको फोन ,भागबन्डा गर्न नयाँ गठबन्धनको बैठक दिउँसो

रविले गृह नछाड्ने, माधवलाई ओलीको फोन ,भागबन्डा गर्न नयाँ गठबन्धनको बैठक दिउँसो

२२ फागुन, काठमाण्डौ ।

मन्त्रालयको भागबन्डा गर्न आज दिउँसो नयाँ सत्ता गठबन्धनको बैठक बस्दैछ । बैठक दिउँसो तीन बजे डाकिएको जनता समाजवादी पार्टीका केन्द्रीय कार्यकारिणी सदस्य राजेन्द्र श्रेष्ठले बताएका छन् । उनका अनुसार बालुवाटारमा सत्ता गठबन्धनको बैठक बस्ने छ ।

त्योभन्दा अघि सत्ता गठबन्धनले लोकतान्त्रिक समाजवादी र एकीकृत समाजवादी पार्टीसँग पनि छलफल गर्ने श्रेष्ठले बताए । प्रतिनिधि सभामा नेकपा (एमाले) को ७७, माओवादी केन्द्रको ३२, रास्वपाको २१, जसपाको १२ सिट रहेको छ । सोमबार यी दलहरूबीच सत्ता सहकार्यको समझदारी भएर आठ बुँदे सहमति भएको थियो ।

अब १० सिट रहेको एकीकृत समाजवादी, तीन सिट रहेको नागरिक उन्मुक्ति, चार सिट रहेको लोकतान्त्रिक समाजवादी पार्टीलाई पनि जोड्ने प्रयास भइरहेको माओवादी केन्द्रमा महासचिव देव गुरूङले बताए । उनीहरूसँग छलफल सकिएपछि सत्ता गठबन्धनको बैठक बसेर मन्त्रालय बाँडफाँट हुने श्रेष्ठले जानकारी दिए ।

‘ती दलहरूसँग सहमति भयो भने उहाँहरूलाई पनि मन्त्रालय छुट्टयाउनुपर्ने हुन्छ,’ श्रेष्ठले भने । नयाँ सत्ता गठबन्धनबाट हितबहादुर तामाङ, पदम गिरी, डोलप्रसाल अर्याल (डिपी) ले मन्त्रीको शपथसमेत लिइसकेका छन् । मन्त्रालयको टुंगो नलागेकोले जिम्मेवारी पछि तोकिने गरी उनीहरूले पथ तथा गोपनीयताको शपथ लिएका हुन् ।

सोमबार साँझै प्रधानमन्त्री पुष्पकमल दाहाल ‘प्रचण्ड) र माओवादीका उपाध्यक्ष नारायणकाजी श्रेष्ठले एकीकृत समाजवादीका अध्यक्ष माधवकुमार नेपालसँग भेटवार्ता गरेका थिए । भेटमा नयाँ गठबन्धनमा सहकार्य गर्न प्रस्ताव गरिएको माओवादी केन्द्रका महासचिव गुरूङले बताए ।

माधवलाई भेट्न प्रचण्ड पुग्नुअघि एमाले अध्यक्ष केपी शर्मा ओलीले पनि माधव नेपाललाई फोन गरेका थिए । उनले नेपाललाई भेट्न प्रधानमन्त्री प्रचण्ड आउँदै गरेको भन्दै उनले अघि बढाउने प्रस्तावमा आफ्नो पनि सहमति रहेको बताए । ओलीले नेपाललाई फोन गर्दा प्रधानमन्त्री प्रचण्डसहित माओवादी र एमालेका केही नेता पनि साथै थिए ।

कुराकानीमा सहभागी माओवादी उपमहासचिव वर्षमान पुनका अनुसार सोमबार अपराह्न ओलीले नेपाललाई फोन गर्दै भने, ‘स्वास्थ्यलाभको कामना छ । म बाहिर जानुपर्ने भएकाले तपाईंलाई भेट्न आउन सकिनँ । प्रधानमन्त्रीजी त्यहाँ आउँदै हुनुहुन्छ । तपाईंसँग प्रधानमन्त्रीले ल्याउनुहुने कुरा मेरो पनि हो ।’

माधव नेपाललाई गठबन्धनमा आउन ओली–प्रचण्डले फकाइरहँदा यता नयाँ सत्ता साझेदार दल रास्वपाले गृहसहित ४ मन्त्रालय दाबी गरेको छ । गृह मन्त्रालयलाई बटमलाइन बनाएर न्युनतम ४ मन्त्रालयमा दाबी रहने पार्टी उपसभापति स्वर्णिम वाग्लेले बताए । गृहमा अरु कसैको दाबी भए पनि रास्वपाले नछाड्ने उपसभापति वाग्लेले बताए ।

उक्त मन्त्रालयको नेतृत्व सभापति रवि लामिछानेले नै गर्ने उनको भनाइ छ । ‘एमालेको दाबी होला तर गृह त हामी छोड्दैनौं । गृह त हाम्रो बटम लाइन नै हो,’ उनले भने, ‘यत्रो मूल्य चुकाएर पुराना पार्टीमा जानु छ । गृह नै पाइएन भने त औचित्य नै हुँदैन ।’ आज दिउँसो मन्त्रालय भागबन्डाका लागि सत्ता गठबन्धन दलहरूको बैठकमा रास्वपाबाट वाग्ले नै सहभागी हुनेछन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.