२९ फागुन,एजेन्सी ।
भारतमा एक लडाकु जहाज दुर्घटना भएको छ । राजस्थानको जैसलमेरमा भारतीय वायु सेनाको तेजस विमान क्र्यास भएको हो । जहाजका चालक भने सकुशल रहेको बीबीसी भारतले जनाएको छ ।
यो जहाज भारतले निर्माण गरेको जहाज हो जुन सन २००१ बाट सञ्चालनमा आएको हो । दुर्घटनाको जानकारी भारतीय वायु सेनाले आफ्नो सामाजिक सञ्जालमा साझा गरेको छ ।
जसमा लेखिएको छ, “भारतीय वायुसेनाको एक तेजस विमान आज अपरेशनल ट्रेनिंग उडानका क्रममा जैसलमेरमा दुर्घटनाग्रस्त भएको छ। पायलट सुरक्षित बाहिर निस्किएका छन् । दुर्घटनाको कारण पत्ता लगाउनका लागि कोर्ट अफ इंक्वायरीको आदेश दिइएको छ ।“
विमान जैसलमेरमा डेडानसर नजिकै भील समाजको होस्टलमा खसेको थियो । दुर्घटनाका बेला होस्टलमा छात्रहरु भने थिएनन् । यूआईटी सचिव जितेंद्र सिंह नरुका, आयुक्त लजपाल सिंह सोढासहित प्रहरी र प्रशासनका अधिकारी घटनास्थलमा पुगेका थिए ।
पोकरणमा आज तीनवटै सेनाहरुको युद्ध अभ्यास ’भारत शक्ति’ चलिरहेको थियो । यो विमान पनि अभ्यासमा सहभागी भएको भारतीय मिडियाहरुले जनाएका छन् ।
यो दुर्घटना त्यस्तो बेला भएको छ जतिबेला प्रधानमन्त्री नरेन्द्र मोदी पनि युद्धाभ्यास भारत शक्ति अवलोकन गर्नका लागि आज राजस्थानको पोकरण फायरिंग रेन्जमा पुगेका थिए ।
यो अभ्यासका क्रममा भारतका तीन सेना जल, स्थल र वायु सेनाका स्वदेशमा निर्मित रक्षा उपकरणहरुको शक्तिको प्रदर्शन गरेका थिए ।
