चैत ५ , एजेन्सी ।
उत्तर कोरियाले फेरि दक्षिण कोरिया र अमेरिकाविरुद्ध चेतावनीस्वरुप क्षेप्यास्त्र प्रहार गरेको छ । दक्षिण कोरिया र संयुक्त राज्य अमेरिकाबीचको संयुक्त सैन्य अभ्यासको एक दिनपछि आज विहान उत्तर कोरियाले आफ्नो पूर्वी समुद्रतर्फ धेरैवटा छोटो दूरीका क्षेप्यास्त्र प्रहार गरेको छ ।
समाचार एजेन्सी पीटीआईका अनुसार जापानी प्रधानमन्त्री फुमियो किशिदाले संसद् बैठकमा उत्तर कोरियाले कोरियाली प्रायद्वीप र जापानबीचको जल क्षेत्रमा धेरैवटा मिसाइल प्रहार गरेको बताएका छन् । उनले भने, ‘यी क्षेप्यास्त्र जापानको विशेष आर्थिक क्षेत्र बाहिर खसेका छन् र कुनै क्षतिको खबर छैन।’
जापानी प्रधानमन्त्री किशिदाले उत्तर कोरियाको यो कदम जापानको शान्ति र सुरक्षाका लागि चेतावनी भएको बताए । ‘यो घटना यस क्षेत्र र अन्तर्राष्ट्रिय जगत् दुवैका लागि खतरा हो। उत्तर कोरियाले मिसाइल प्रहार गरेर संयुक्त राष्ट्र सुरक्षा परिषद्को प्रस्तावको उल्लंघन गरेको छ’, उनले भने ।
सुरक्षा परिषद्ले उत्तर कोरियाको मिसाइल गतिविधिमा प्रतिबन्ध लगाएको छ । उत्तर कोरियाको छिमेकी देश दक्षिण कोरियाको सेनाले पनि केही संदिग्ध छोटो दूरीका क्षेप्यास्त्र फेला पारेको जनाएको छ । उत्तर कोरिया नजिकै दक्षिण कोरिया र अमेरिकाबीच ११ दिने कम्प्युटर सिमुलेटेड कमान्ड पोस्ट तालिम चलिरहेको थियो ।
यस सैन्य अभ्यासमा ४८ वटा क्षेत्रीय अभ्यास गरिएको छ । यो गत वर्षको तुलनामा दोब्बर अभ्यास हो । सोमबार उत्तर कोरियाले यस्तो बेला मिसाइल परीक्षण गरेको हो, जतिबेला अमेरिकी विदेशमन्त्री एन्थोनी ब्लिंकन दक्षिण कोरिया भ्रमणमा रहेका छन् । प्रजातन्त्र सम्मेलनको लागि अमेरिकी विदेशमन्त्री दक्षिण कोरियाको राजधानी सोउलमा भएकै समयमा उत्तर कोरियाले मिसाइल परीक्षण गरेको हो ।
