१ वैशाख , एजेन्सी ।
इरान र इजरायलबीच बढ्दो तनावका बीच अमेरिकी राष्ट्रपति जो बाइडेनले इजरायलमाथि आक्रमण नगर्न इरनलाई चेतावनी दिएका छन्। बाइडेनले इरानले सिरियामा रहेको आफ्नो दूतावासमा भएको आक्रमणको इजरायलविरुद्ध बदला लिने चिन्ता व्यक्त गरे। इरानले इजरायलमा आक्रमण गर्न सक्नेबारे प्रश्न गर्दा बाइडेनले भने, ‘यो नगर्नुहोला ।’ बाइडेनले अमेरिकाले इजरायललाई समर्थन गर्ने स्पष्ट पारेका छन् ।
‘हामी इजरायलको सुरक्षाको लागि प्रतिबद्ध छौँ । हामी इजरायललाई समर्थन गर्नेछौँ, हामी इजरायलको रक्षा गर्नेछौँ, र इरान सफल हुन सक्दैन,’ उनले भनेका छन् । वास्तवमा, अप्रिल १ मा, सिरियामा इरानको वाणिज्य दूतावासमा हमला भएको थियो, जसमा १३ जनाको मृत्यु भएको थियो। यस हमलामा इरानको एलिट कुड्स फोर्सका एक शीर्ष कमाण्डर र उनका सहायक पनि मारिएका छन्।
यो घटनाको पूर्ण दोष इजरायलमाथि लगाउदै इरानले कुनै पनि अवस्थमा बदला लिने चेतवनी दिदै आएको छ । यता बढ्दो तनावकै बीच भारतसहित ५ देशले ट्राभल एडभाइजरी जारी गरेका छन् । इरानले इजरायलमा तत्कालै आक्रमण गर्न सक्ने अनुमानपछि भारतसहितका ५ देशले ट्राभल एड्भाइजरी जारी गर्दै नागरिकहरुलाई इरान र इजरायलमा अनावश्यक यात्रा नगर्न आग्रह गरिएको छ ।
भारत, अमेरिका, बेलायत, रुस र फ्रान्सले आफ्ना नागरिकलाई उच्च सतर्कता अपनाउन पनि आग्रह गरेका छन् । भारतले शुक्रबार बेलुका ट्राभल एड्भाइ जारी गरी आफ्ना नागरिकलाई अर्को सूचना नभएसम्म इरान र इजरायलको यात्रा नगर्न आग्रह गरेको बीबीसी हिन्दीले जनाएको छ । भारतीय विदेश मन्त्रालयले इरान वा इजरायलमा बस्ने भारतीयले त्यहाँको दूतावासमा सम्पर्क गरी आफूलाई दर्ता गराउन, आफ्नो सुरक्षाका उपायहरु अपनाउन र सकेसम्म बाहिर ननिस्कन भनेको छ ।
भारतले यस्तो बेला ट्राभल एडभाइजरी दिएको हो जब अमेरिकी अखबार वाल स्ट्रीट जर्नल (डब्ल्यूएसजे) ले आगामी दुई दिनमा इरानले इजरायलमा आक्रमण गर्न सक्ने दाबी गरेको छ । अमेरिकी गुप्तचर निकायलाई उद्धृत गर्दै डब्ल्यूएसजेले शुक्रबार यो जानकारी दिएको हो। डब्ल्यूएसजेले प्रतिवेदनमा एक इरानी अधिकारीलाई उद्धृत गर्दै आक्रमणको योजना इरानका सर्वोच्च नेता अयातोल्लाह खामेनीसँग साझा गरिएको बताएको छ। इरान र इजरायलबीच जारी तनावका बीच अमेरिकी विदेशमन्त्री एन्टोनी ब्लिन्केनले साउदी अरेबिया, चीन, टर्की र धेरै युरोपेली देशका विदेशमन्त्रीहरूसँग फोनमा कुराकानी गरेका छन् ।
ब्लिन्केनले सबै देशहरूलाई इरानलाई आक्रमण नगर्न मनाउन आग्रह गरेका छन्। अमेरिकी विदेश मन्त्रालयका प्रवक्ता म्याथ्यु मिलरले भने, ’विवादलाई बढावा दिनु कसैको हितमा छैन । यसअघि बिहीबार अमेरिकाले इजरायलमा काम गर्ने आफ्ना नागरिक र विशेषगरी कूटनीतिज्ञहरूका लागि सल्लाहकार जारी गरेको थियो ।’ अमेरिकाले आफ्ना दूतावासका कर्मचारीहरूलाई जेरुसेलम, तेल अवीभ वा बेरशेबा सहरमा सावधानी अपनउन आग्रह गरेको छ।
