१९ वैशाख , एजेन्सी ।
१७औँ संस्करणको इन्डियन प्रिमियर लिग (आईपीएल) क्रिकेटको बुधबारको खेलमा चेन्नई सुपर किङ्सले पन्जाब किङ्सको सामना गर्दैछ । खेल चेन्नईस्थित एमए चिदम्बरम स्टेडियममा राति ७ः४५ बजे सुरु हुनेछ । यो सिजनको आईपीएलमा चेन्नई र पन्जाब पहिलो पटक भिड्न लागेका हुन् । आईपीएलको १७औँ संस्करणमा दुवै टोलीले आफ्नो १०औँ खेल खेल्न लागेका हुन् ।
बुधबारको खेलमा पराजित भए पन्जाबको अगाडि बढ्ने सम्भावना लगभग समाप्त हुनेछ । चेन्नईले यसअघि खेलिएको नौमध्ये पाँच खेलमा जित र चार खेलमा हारको नतिजा निकालेको छ । चेन्नई १० अंकसहित तालिकाको चौथो स्थानमा छ । पञ्जाबले यसअघि खेलेको नौमध्ये तीन खेलमा जित र ६ खेलमा हारको नतिजा निकालेको छ ।
पन्जाब ६ अंकसहित तालिकाको आठौँ स्थानमा छ । इन्डियन प्रिमियर लिगमा चेन्नई सुपर किङ्स र पन्जाब किङ्सबिच हालसम्म कुल २८ खेल खेलिएको छ । त्यसमध्ये १५ खेलमा चेन्नईले पञ्जाबलाई हराएको छ । १३ खेलमा भने पञ्जाबले चेन्नईलाई हराएको छ । चेन्नई र पञ्जाबबीच पछिल्लो पटक आईपीएलको १६औँ संस्करणमा भिडन्त भएको थियो ।
उक्त खेलमा पञ्जाबले चेन्नईलाई चार विकेटले पराजित गरेको थियो । यसैबीच आईपीएलमा गएराति सम्पन्न खेलमा लखनऊ सुपर जायन्ट्स विजयी भएको छ । लखनऊले मुम्बई इन्डियन्समाथि ४ विकेटको जित निकालेको हो । मुम्बईले दिएको १४४ रनको लक्ष्य पछ्याएको लखनऊको टोलीले १९.२ ओभरमा ६ विकेट गुमाएर लक्ष्य पूरा गरेको थियो ।
जितसँगै लखनऊले प्लेअफ सम्भावना पनि बलियो बनाएको छ । जारी प्रतियोगिताको अंक तालिकामा लखनऊ १२ अंकका साथ तेस्रो स्थानमा छ । पराजित मुम्बई समान खेलबाट ६ अंक जोड्दै नवौँ स्थानमा यथावत् छ।
