२९ साउन, विराटनगर । पछिल्लो केही समययता अशान्त बनेको बंगलादेशमा अस्वाभाविक रूपमा मूल्य वृद्धिदर बढेको छ ।
बंगलादेशको तथ्यांक विभाग (बिबिएस) का अनुसार बंगलादेशको मुद्रास्फिति दर जुलाईमा ११.६६ प्रतिशत पुगेको छ । यो बंगलादेशमा १३ वर्षयताकै सबैभन्दा बढी वृद्धि दर हो ।
मुख्यतया खाद्यान्नको मूल्य वृद्धिका कारण मूल्य वृद्धिदर अस्वाभाविक रूपमा बढेको विभागको तथ्यांकले जनाएको छ । गत जुन महिनामा मूल्यवृद्धि दर ९.७२ प्रतिशत रहेको बिबिएसको तथ्यांकले देखाएको छ ।
बिबिएसका अनुसार खाद्य मूल्यवृद्धि जुलाईमा १४.१० प्रतिशतले बढेको छ, जुन एक दशकको अवधिमा सबैभन्दा बढी हो । यसैगरी जुन महिनामा पनि खाद्य मूल्यवृद्धि दर १०.४२ प्रतिशत थियो ।
गैर–खाद्य पदार्थको मूल्य वृद्धिदर पनि जुनमा ९.१५ प्रतिशतबाट बढेर जुलाईमा ९.६८ प्रतिशत पुगेको तथ्यांकले देखाएको छ ।आर्थिक वर्ष २०२३–२४ मा देशको औसत मूल्य वृद्धिदर बढेर ९.७३ प्रतिशत पुगेको छ जुन आर्थिक वर्षका लागि तय भएको बजेटको लक्ष्य भन्दा धेरै हो ।
तथ्यांकअनुसार अघिल्लो आर्थिक वर्ष २०२२–२३ मा बंगलादेशको मूल्य वृद्धिदर ९.०२ प्रतिशत रहेको थियो ।
