३० साउन, विराटनगर । अर्जेन्टिनी स्ट्राइकर लियोनल मेस्सीआबद्ध इन्टर मियामी अमेरिकन लिग्स कपको क्वार्टरफाइनल नपुग्दै बाहिरिएको छ । बुधबार बिहान भएको अन्तिम १६ को खेलमा मियामी कोलम्बससँग ३–२ गोलान्तरले हारेको हो ।
कोलम्बसको मैदानमा भएको खेलमा मियामीले सुरुआती अग्रता बनाएको थियो । तर, दोस्रो हाफमा तीन गोल गरेको कोलम्बस मियामीलाई हराउँदै अगाडि बढेको हो ।
खेलको १०औं मिनेटमा माटियास रोजसले गोल गर्दै पहिलो हाफभरि मियामीलाई अग्रता दिलाएका थिए । ६२औं मिनेटमा डिएगो गोमेजले गोल गरेपछि मियामीले आफ्नो अग्रता दोब्बर बनायो ।
६७औं मिनेटमा क्रिस्टियन रमिरेज र ६९औं मिनेटमा डिएगो रोसीले गोल गरेपछि कोलम्बस बराबरीमा फर्कियो । ८०औं मिनेटमा रोसीले दोस्रो गोल गर्दा कोलम्बसले ३–२ गोलको जित निकालेको हो ।
यस खेलमा मियामी स्टार खेलाडी मेस्सीबिना मैदान उत्रिएको थियो । गत महिनामा सम्पन्न कोपा अमेरिकाको दौरान घाइते भएका मेस्सी अहिले आराम गरिरहेका छन् ।
