ओली र देउवाविरुद्धको नाराबाजीको संकेत के हो ?

११ भदौ , विराटनगर ।

सोमबार गौरा पर्वको अवसरमा काठमाडौंको टुँडिखेलमा सधैँ झैँ एक कार्यक्रमको आयोजना गरिएको थियो । जहाँ प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा, पर्यटनमन्त्री बद्री पाण्डे, वनमन्त्री ऐनबहादुर शाही, एमाले नेता भीम रावलसहितका नेताहरुको सहभागिता रहेको थियो ।

तर जब कार्यक्रममा पूर्व प्रधानमन्त्री शेरबहादुर देउवा बोल्न पुगे युवाहरुको एक समूहले नाराबाजी गरे । युवा त्यतिमै रोकिएनन् । उनीहरुले प्रधानमन्त्री ओलीको सम्बोधनमा पनि नाराबाजी गरे । प्रधानमन्त्री र पूर्वप्रधानमन्त्रीविरुद्ध यसरी नाराबाजी गरिएको विषय भने संसदमा समेत उठेको छ । यो घटनालाई बंगलादेशको घटनाको आगोको झिल्को र घण्टी बजेको टिप्पणी गरिएको छ ।

आज संसदमा बोल्दै पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले पनि यो विषय उठाएका छन् । पछिल्लो समय राजनीतिक उथलपुथल भएका दक्षिण एसियाका श्रीलंका र बंगलादेशको उदाहरण प्रस्तुत गर्दै प्रचण्डले सरकार स्वार्थ समूहका पक्षमा उभिएपछि आगोको झिल्को निस्किएको भन्दै त्यो लोकतन्त्रकै लागि खतरा रहेको बताएका छन् ।

यस्तै सांसद डा.अमरेशकुमार सिंहले गौरा पर्व मनाउने क्रममा सोमबार टुँडिखेलमा प्रधानमन्त्री केपी शर्मा ओली र पूर्वप्रधानमन्त्री शेरबहादुर देउवाविरुद्ध लागेको नाराले नेताहरू सच्चिने बेला आएको बताएका छन् । उनले जनताले नेताहरूविरुद्ध घण्टी बजाउन सुरु गरेको बताए । यसबारेमा उनले सरकारलाई सच्चिएर जनताको आक्रोश सम्बोधन गर्न पनि सुझाएका छन् ।

सांसद सिंहले दुईतिहाइको दम्भमा नरहन सरकारलाई सुझाव दिएका छन् । बंगलादेशकी प्रधानमन्त्री शेख हसिनाले दुईतिहाइको सरकार हुँदा पनि देश छाड्नुपरेको स्मरण गराउँदै उनले दलीय अंकगणितले केही नहुने बताए । ‘हिजो टुँडिखेलमा जुन घटना भएको छ, पाटनको कृष्ण मन्दिरमा पनि घटना भएको छ । म सदनको ध्यानाकर्षण गर्न चाहन्छु । त्यो हाम्रो लागि जसरी घण्टी बजाएर संसद्को प्रक्रियामा भाग लिन्छौँ, त्यस्तै हो’, उनले भने, ‘सरकारसँग म प्रश्न गर्न चाहन्छु– तपाईंहरू पहिले जस्तै चल्ने कि सुध्रिने ? नत्र मैले भयावह स्थिति देख्दैछु । आज सत्तामा हुनुहुन्छ, दलीय अंक गणित त शेख हसिनासँग पनि थियो, तर उनले देश छाड्नु प¥यो ।’

यही अंकगणितको विषय प्रचण्डले समेत उठाएका थिए । उनले भने ‘सत्तासीन साथीहरूलाई मेरो अनुरोध छ, सङ्ख्याको भ्रममा नपरौँ, सत्यसँग साक्षात्कार गरौँ । धेरै टाढाका, अघिका, इतिहासका ठुला शिक्षा म भन्दिनँ, छेवैका श्रीलंका र बंगलादेशका घटनाबाट सिकौँ । श्रीलंकामा राजापाक्षेजी सङ्ख्याको सङ्कटले बाहिरिनुभएको हो ? होइन’– अध्यक्ष प्रचण्डले भने– ‘बंगलादेशी पार्लियामेन्टलाई त अवामी लिग र त्यही गठबन्धनको एकलौटी प्रतिनिधित्वको वन पार्टी पार्लियामेन्ट भनिन्थ्यो । त्यो थियो, अस्ति जनवरीको निर्वाचनको परिणाम, हाम्रोभन्दा तेह्र महिना कान्छो । तपाईँहरू जोडतोडको दुई तिहाइको घमन्डमा हुनुहुन्छ भने यो घमण्डबाट बिउँझनोस् । जनताको विवेकको अवमूल्यन नगर्नोस् ।’

टुँडिखेलमा गौरा पर्व मनाउन अतिथिका रुपमा पुगेका प्रधानमन्त्री ओली र कांग्रेस सभापति देउवाविरुद्ध नाराबाजी भएको थियो । गौरा मनाउन जम्मा भएका केही युवाहरूले पछाडिबाट आपत्तिजनक र अराजक शैलीमा नाराबाजी गरेका थिए । उनीहरू ओली र देउवाविरुद्ध नाराबाजीमात्र गरिरहेका थिएनन्, काठमाडौं महानगरपालिकाका मेयर बालेन शाहको समर्थनमा हुटिङ पनि गरिरहेका थिए ।

भाषणका क्रममा प्रधानमन्त्री ओली उनीहरूप्रति संयम भएर बोले । उनले नेपाली समाज बहुसांस्कृतिक र शान्तिप्रेमी भएकाले समाजलाई बिथोल्ने र भड्काउने प्रयास सफल नहुने बताए । तर, कांग्रेस सभापति देउवा निकै आक्रामकरूपमा प्रस्तुत भए । प्रायः छोटो भाषण गर्ने देउवा नाराबाजी गर्नेविरुद्ध खनिए । देउवाले रिस थाम्न सकेनन् । सुरुमा त उनले ’जति कराउनु छ, तपाईंहरू कराउनुस्’ भने । दर्शकदीर्घाबाट आवाज झन् चर्को बन्यो । अनि देउवाले औँला ठड्याएरै भने, “लाज पनि छैन, अर्काको कार्यक्रम बिथोल्ने ? लाज नभएकाहरू, बदमासहरू ।“

यता शीर्ष नेताहरू विरुद्ध नारा लगाउनेहरू खोज्न सुरु गरिएको छ । गौरा पर्व बिथोलिने डरले सोमबार कार्यक्रममा केही पनि नगरिए पनि प्रशासनको सहयोगमा उशृंखल गतिविधि गर्नेहरूको खोजी थालिएको आयोजक संस्थाले जनाएको छ । प्रकृति, संस्कृति, सामाजिकता संरक्षण समूह (प्रसंसा) ले २७ वर्ष देखी काठमाडौँमा गौरा पर्व मनाउँदै आइरहेको छ । यति लामो यात्रामा पहिलो पटक सोमबारको कार्यक्रममा अतिथिहरु माथि यस्तो नाराबाजी भएको छ ।