१२ भदौ, विराटनगर ।
बंगलादेशले दक्षिण एसियाली फुटबल महासंघ (साफ) यु–२० च्याम्पियनसिप फुटबलको उपाधि जितेको छ । बुधबार (आज) भएकाे फाइनल खेलमा घरेलु टोली नेपाललाई ४-१ गोलले हराउँदै बंगलादेश उपाधि जितेको हो ।
बंगलादेशको यो पहिलो उपाधि हो । गत संस्करणमा भारतसँग अतिरिक्त समयमा ५-२ गोलले पराजित हुँदै बंगलादेश उपाधिबाट विमुख भएको थियो । त्यसअघि बंगलादेश सन् २०१७ मा नेपालसँग र २०१९ मा भारतसँग पराजित हुँदै उपाधिबाट बञ्चित भएको थियो ।
तर, यसपालि भने बंगलादेशले घरेलु टोली नेपाललाई स्तब्ध बनाउँदै पहिलोपटक उपाधि उचालेको हो । सातदोबाटोस्थित एन्फा मैदानमा भएको खेलमा बंगलादेशले पहिलो हाफमा १ गोल गर्यो भने दोस्रो हाफमा तीन गोल थप्यो ।
बंगलादेशले पहिलो हाफको इन्ज्युरी समयमा, ५४औं मिनेटमा, ७०औं मिनेटमा र खेल सकिनै लाग्दा बंगलादेशले गोल गरेको थियो । ८०औं मिनेटमा समीर तामाङले गोल गर्दै खेल ३-१ गोलको अवस्थामा ल्याएका थिए । तर, नेपालले अरू गोल थप्न नसक्दा बंगलादेश च्याम्पिनय बनेको हो ।
सेमिफाइनलमा दुवै टोलीले टाइब्रेकरमा बाजी मारेर फाइनल यात्रा तय गरेका हुन् । सेमिफाइनलमा नेपालले भुटानलाई टाइब्रेकरमा ४–१ गोल र बंगलादेशले साबिक विजेता भारतलाई टाइब्रेकरमै ४–३ गोलले हराएको थियो ।
नेपाल भने सन् २०१७ पछि साफको उमेरसमूहको प्रतियोगिताको उपाधिनजिक पुगेको थियो । यसअघि सन् २०१५ र २०१७ गरी दुईपटक फाइनल पुगेको नेपालले ती दुवै प्रतियोगिताको उपाधि जितेको थियो । तर, त्यसयताका तीन संस्करणमा भने नेपाल च्याम्पियन बन्न सकेको छैन ।
नेपालले ९ वर्षअघि सन् २०१५ मा उमेरसमूहको साफको पहिलो संस्करण आयोजना हुँदा भारतलाई पराजित गर्दै उपाधि जितेको थियो ।उक्त प्रतियोगिता पनि एन्फा कम्प्लेक्समै भएको थियो । सन् २०१७ मा भुटानको थिम्पुमा सिंगल राउन्ड रोबिनमा भएको साफ यु–१८ नेपालले बंगलादेशलाई गोल संख्यामा पछि पार्दै दोस्रोपटक उपाधि जितेको थियो ।
नेपाल चार पटक साफअन्तर्गतका उमेर समूहका प्रतियोगिता आयोजना गर्दा एकपटक सन् २०१५ मा उपाधि घरमै राख्न सफल भएको छ । सन् २०१९ र २०२३ मा भने नेपालमा प्रतियोगिता हुने तर च्याम्पियनचाहिँ भारत हुने सिलसिला बढेको थियो ।
