१४ भदौ, विराटनगर ।
फ्रान्सको राजधानी पेरिमा जारी पेरिस पारालिम्पिक–२०२४ अन्तर्गत नेपालकी पलेशा गोबर्धनले जित आत्मसात् गरेकी छन् । शुक्रबार भएको के–४४ क्याटगोरीको महिला ५७ केजीमुनिको पहिलो खेलमा पलेशा जित निकालेकी हुन् ।
उन्ड अफ १६ को खेलमा पलेशाले भेनेन्जुएलाकी भलेरियाविरुद्ध शुक्रबार ३१-० को जित निकालेकी हुन् । यससँगै उनी क्वार्टरफाइनलमा पनि प्रवेश गरेकी छन् । अब, उनले अन्तिम आठमा ब्राजिलकी सिल्भाना फर्नान्डेससँग खेल्नेछिन् ।
पलेशा र सिल्भानाबीचको क्वार्टरफाइनल खेल आजै अपराह्न ४:०९ बजेबाट सुरु हुने छ ।
छनोट चरण पार गर्दै पलेशाले पेरिस पाराओलम्पिकमा प्रतिस्पर्धाका लागि छानिएकी हुन् । उनले गत चैतमा चीनको ताइयानमा भएको पारालिम्पिकको एसियाली छनोट प्रतियोगितामा स्वर्ण जितेकी थिइन् ।उनी छनोट चरण पार गर्दै पारालिम्पिक खेल्ने पहिलो नेपाली खेलाडी हुन् । पलेशा १९ औं एसियाली खेलकुदकी पनि ऐतिहासिक कास्य पदक विजेता हुन् ।
यसअघि चीनको हान्झाउमा भएको चौथो प्याराएशियाली खेलकुदमा तेक्वान्दोको के ४४ विधाको ५७ केजी तौल समूहमा प्रतिस्पर्धा गर्दै पलेशाले कांस्य पदक प्राप्त गरेकी थिइन् ।
नेपाली पारा तेक्वान्दो टोली इङल्यान्डको म्याचेस्टरमा १ महिनाको तयारी प्रशिक्षणपछि जुलाई २५ तारिखमा पेरिस पुगेको थियो । यसअघि तेक्वान्दोमै नेपालका भरतसिंह महरा पहिलो चरणमै पराजित भएका थिए ।
पेरिस पारालिम्पिकमा पलेशा र भरतसहित पौडीका भीमबहादुर कुमालले पनि प्रतिस्पर्धा गर्दै छन् । उनले पुरुष ५० मिटर फ्रिस्टायलमा सहभागिता जनाउने छन् ।
