१५ भदौ, विराटनगर ।
नेपाली कांग्रेसभित्र महामन्त्रीद्वय विश्वप्रकाश शर्मा र गगन थापाको प्रतिवेदनलाई लिएर पटकपटक छलफल भइसकेको छ । पछिल्लो समय कांग्रेसमा टाउको दुखाइकै विषय बनेको महामन्त्रीद्वय थापा र शर्माको प्रतिवेदनका विषयमा गहन छलफलका लागि सभापति शेरबहादुर देउवा लागिपरेका छन् ।
आफू अफ्ठेरोमा पर्ने छाँटकाँट देखिएपछि सत्तारूढ दल कांग्रेसका सभापति देउवा महामन्त्री शर्मा र थापाको प्रतिवेदनमा मध्यमार्गी विकल्पको खोजीमा छन् । किनकि, महामन्त्री शर्माले अगाडि सारेको प्रस्ताव पारित भएमा देउवाका लागि अब प्रधानमन्त्री हुने बाटो बन्द हुने छ । यसैले पनि तातिएका देउवा प्रतिवेदनप्रति गम्भीर भएर लागिपरेका छन् ।
केही दिनअघि केन्द्रीय समितिको बैठकमा प्रतिवेदनउपर पक्ष–विपक्षमा आवाज उठेपछि देउवाले शर्मा र थापालाई छुट्टाछुट्टै बोलाएर छलफल गरे । उनले यसबीचमा पनि धेरै पटक शीर्ष नेताहरूसँग छलफल गरे । तर, अझै पनि प्रतिवेदन पारित गर्ने वा परिमार्जनसहित पारित गर्ने भन्नेबारे देउवा निर्णयमा पुग्न सकेका छैनन् ।
आज शनिबार बुढानिलकण्ठमा पार्टीका पूर्व तथा वर्तमान पदाधिकारीहरूबीच छलफल पनि ठोस सहमतिमा पुग्न सकेनन् । अब आइतबार केन्द्रीय समितिको बैठकअघि फेरि प्रतिवेदनका विषयमा छलफल हुने बताइएको छ ।गत वर्षको फागुनमा ललितपुरको गोदावदरीमा भएको महासमिति बैठकमा महामन्त्रीद्वय थापा र शर्माले प्रतिवेदन पेस गरेका थिए । महामन्त्री थापाले आगामी निर्वाचनदेखि कसैसँग पनि गठबन्धन गर्न नहुने र अर्का महामन्त्री शर्माले नेताहरू एक पटक राष्ट्रपति, दुई पटक प्रधानमन्त्री, तीन पटक मन्त्री र चार पटकभन्दा बढी सांसद बन्न नपाउने प्रस्ताव अगाडि सारेका थिए ।
उनीहरूको प्रतिवेदनलाई लिएर अहिले कांग्रेसमा विवाद चर्किएको छ । सभापति देउवाले दुवै महामन्त्रीका प्रस्तावलाई परिमार्जित गरेर पारित गर्न चाहेका छन् । सभापति देउवाले चुनावमा गठबन्धन गर्ने विषय नीतिगत नभएर पार्टीको रणनीतिक योजना भएकाले यसलाई अहिले नै निर्णय गरेर जान नहुने पक्षमा रहेका छन् ।
त्यस्तै देउवा पक्षले महामन्त्री शर्माले राखेको प्रस्ताव मान्य नहुने भन्दै सो प्रस्ताव फिर्ता लिनुपर्ने धारणा राख्दै आएका छन् । महामन्त्रीद्वयको प्रस्तावमा सहमति हुन नसक्दा गत मंगलबार नै बस्नुपर्ने केन्द्रीय समितिको बैठक भोलि आइतबारका लागि बोलाइएको छ ।
भोलि बस्ने केन्द्रीय समितिको बैठकमा महामन्त्री थापाको प्रतिवेदन परिमार्जनसहित पेस गरिनेछ । थापाको प्रतिवेदन केही परिमार्जनसहित अन्तिम रूप दिएर पेस हुँदा अर्का महामन्त्री विश्वप्रकाश शर्माको प्रतिवेदन अहिलेलाई यथावत राखिने छ । विश्वप्रकाशको प्रतिवेदनमा संविधान संशोधनसँग सम्बन्धित कुरा भएकाले पनि संविधान संशोधनको कुरा उठेको बेला छलफल गरिने बताइएको छ ।
त्यसबाहेक शर्माको प्रतिवेदनमा प्रधानमन्त्री जतिसुकै लोकप्रिय बनेपनि उसले दुई पटक भन्दा बढी बन्न नपाउने व्यवस्था छ । यसले गर्दा कठिनाइमा परेका देउवाले शर्मा प्रतिवेदनउपर छलफल गर्न पनि आनाकानी गरेका हुन् ।
तर, शर्मा भने दुई पटक मात्रै प्रधानमन्त्री बन्ने प्रस्ताव आइतबार बस्ने केन्द्रीय समितिको बैठकबाटै पास हुने दाबी गर्छन् । उक्त नीति साझा दृष्टिकोण र सहमतिबाट पास हुने उनको भनाइ छ ।
