१६ भदौ, विराटनगर ।
युट्युब च्यानल ‘हेर्ने कथा’ को ‘हराएका वर्षहरू’का पात्र प्रकाश तामाङलाई उनकै घरमा पुगेर सरकारी टोलीले आइतबार नागरिकता प्रदान गरेको छ ।
लगभग ३५ वर्ष हराएका ४३ वर्षीय प्रकाशको भोजपुरको षडानन्द नगरपालिका-१० साङपाङको छाप्लेगाउँस्थित घरमै पुगेर टोलीले आवश्यक प्रक्रिया पूरा गरी नागरिकता प्रदान गरेको हो ।
नगरपालिकाका जनप्रतिनिधि र प्रशासनका अधिकारीले उनलाई नेपाली नागरिकताको प्रमाणपत्र प्रदान गरेका हुन् ।
गोरखाको चुमभ्यालीबाट काठमाडौँ हुँदै भोजपुर पुगेका प्रकाशको बुबा-आमासँग नाता कायम र जन्मदर्ताको कागज बनाएर नागरिकता दिलाइएको छ ।षडानन्द नगरपालिकाका मेयर सुरेन्द्र उदास, वडाध्यक्ष प्रेमदोर्जी शेर्पा, प्रमुख प्रशासकीय अधिकृत मोहन चापागाईँ र इलाका प्रशासन कार्यालय दिङ्लाका प्रशासकीय अधिकृत विनोद ज्ञवालीले आवश्यक सरकारी प्रक्रिया पुर्याएर प्रकाशलाई नागरिकता दिएका छन् ।
परिवारसँग लामो समय छुट्टिएका प्रकाश शनिबार काठमाडौंबाट हवाइ उडानमा संखुवासभाको तुम्लिङटार बिमानस्थल हुँदै भोजपुरमा रहेको आफनो घरमा आएका थिए ।
नागरिकता प्रदान गर्दे मेयर उदासले नगरपालिकाको तर्फबाट आगामी दिनमा पनि प्रकाश र परिवारलाई सहयोग गर्ने प्रतिबद्धता जनाए ।
सो क्रममा प्रकाशले अबका दिनमा गाउँमै रहेर खेती किसानी गर्ने मनसाय राखेका छन् ।
