१८ भदौ , काठमाण्डौ।
नेपाल सरकारका प्रवक्ता तथा सञ्चार तथा सूचना प्रविधिमन्त्री पृथ्वीसुब्बा गुरुङलाई आफ्नै अभिव्यक्ति गलपासो बनेको छ । उदण्ड अभिव्यक्ति दिएका गुरुङको सर्वत्र आलोचित मात्र भएको छैन् उनको मन्त्री पद नै धरापमा छ । उनलाई बर्खास्त गर्न सत्तारुढ दल नेपाली कांग्रेसकै सांसदले माग गरेका छन् भने पूर्वप्रहरी संगठन प्रमुख मञ्चले आपत्ति जनाउदै आइजीसँग माफी माग्न आग्रह गरेको छ।
मन्त्री गुरुङले नेपाल प्रहरीका प्रहरी महानिरीक्षक बसन्तबहादुर कुँवरप्रति लक्षित हुँदै आपत्तिजनक अभिव्यक्ति दिएका थिए । गत शनिबार प्रेस चौतारी नेपाल गण्डकीले पोखरामा गरेको पत्रकार सम्मेलनमा बोल्दै प्रवक्ता गुरुङले ‘आइजिपीको जिब्रो थुत्नुपर्ने भन्दै अभिव्यक्ति दिएका थिए । गण्डकी प्रदेशका पूर्वमुख्यमन्त्रीसमेत रहेका गुरुङको अभिव्यक्ति विवादित बनेको थियो ।
उनले भनेका थिए, ‘अस्ति प्रहरीको आइजिपीले के भन्यो ? म लागू नै गर्दिनँ हुँ गर्छ । त्यस्तो बोल्न पाउने कि नपाउने ? त्यसको जिब्रो थुत्नुपर्थ्यो, मैले भन्दाखेरि ।’ गुरुङको यही अभिव्यक्तिलाई लिएर चर्चा भइरहँदा नेकपा एमालेका प्रतिनिधिसभा सदस्यसमेत रहेका उनलाई अहिले आफ्नै अभिव्यक्ति ‘गलपासो’ बनेको छ ।
उनको अभिव्यक्तिको सार्वजनिक रुपमा आलोचना भइरहेको छ । यसले उनको पद धरापमा परेको छ । प्रधानमन्त्री केपी शर्मा ओलीले समेत गुरुङको अभिव्यक्तिमा चासो राखेका छन् । आफूबारे दिइएको अभिव्यक्तिका बारे आइजिपी कुँवरले भने कुनै प्रतिक्रिया दिएका छैनन् । यसबीचमा, अराजक अभिव्यक्ति दिएका मन्त्री गुरुङलाई प्रधानमन्त्री केपी शर्मा ओलीले विशेष ‘क्लास’ नै लिएका थिए ।
ओलीले गुरुङलाई सार्वजनिक रूपमा बोल्दा विचार पु¥याउन निर्देशनसमेत दिएका थिए । बोल्दा भाषा प्रयोगमा ख्याल गर्न पनि प्रधामन्त्रीको निर्देशन थियो । विवादित अभिव्यक्ति दिएका मन्त्री गुरुङले पनि प्रधानमन्त्रीको निर्देशनलाई आफूले पालना गर्ने बताएका छन् । प्रधानमन्त्रीले सरकारको प्रवक्ता भएकाले गर्दा बोल्दाखेरी विवादमा आउनेखालको भाषा प्रयोग नगर्न निर्देशन भएकाले आफू सच्चिने बताएका थिए ।
आफूलाई प्रधानमन्त्रीले सोधपुछ गरी सचेत गराएको र सुझाव दिएको जानकारी दिँदै उनले आफूले पनि अब बोल्दा बिचार पु¥याउने बताएका थिए । अभिव्यक्तिको गलपासो लागेका मन्त्री गुरुङले सच्चिने भनिरहँदा सत्तारूढ नेपाली कांग्रेसकै सांसद पनि उनीविरुद्ध खनिएका छन् । कांग्रेस केन्द्रीय सदस्य तथा संघीय सांसद शंकर भण्डारीले भने उनलाई बर्खास्त गर्न प्रधानमन्त्रीसँग माग गरेका छन् ।
नेता भण्डारी प्रेस विज्ञप्ति जारी गर्दै एमाले नेतासमेत रहेका मन्त्री गुरुङलाई पदबाट बर्खास्त गर्न माग गरेका हुन् । उनले देशको शान्ति सुरक्षा कायम गर्ने जिम्मा लिएको प्रहरी संगठनका प्रमुखलाई सरकारका प्रवक्तासमेत रहेका सञ्चारमन्त्रीबाट सार्वजनिक स्थलमा अपशब्द व्यक्त गरेकोमा त्यसको घोर भत्र्सना गरे ।
प्रधानमन्त्रीले मन्त्री गुरुङलाई बर्खास्त गर्नुपर्छ भन्दै सांसद भण्डारीले यो अभिव्यक्तिको कारण शान्ति सुरक्षामा भविष्यमा कुनै तलमाथि हुन आएमा त्यसको जिम्मेवारी स्वयम् सरकार र प्रधानमन्त्री हुने बताए । भण्डारीले सरकारमा भएका वा जिम्मेवार व्यक्तिले सत्य तथ्य बंग्याएर समाजमा वितृष्णा फैलाउने र पार्टी पार्टीबीच सम्बन्ध बिगार्ने कार्य नगर्न पनि अनुरोध गरेका छन् ।
यस्तै गुरुङको अभिव्यक्तिका विषयमा पूर्वप्रहरी संगठन प्रमुख मञ्चले आपत्ति जनाएको छ । मञ्चले मंगलबार विज्ञप्ति जारी गर्दै एक विशिष्ट श्रेणीका राष्ट्रसेवक प्रहरी प्रमुखमाथि सार्वजनिक कार्यक्रममै ‘जिब्रो थुत्नुपर्ने’ अभिव्यक्ति भाषिक अराजकता रहेको जनाएको हो । यस्ता प्रकारका भाषाले पूरै प्रहरी संगठनको मानमर्दन भएको मञ्चले उल्लेख गरेको छ । उक्त अभिव्यक्ति ‘फिर्ता लिएर’ आईजीपीसँग माफी माग्न मन्त्री गुरुङलाई मञ्चले आग्रह गरेको छ ।
