१९ भदौ , काठमाण्डौ।
प्रधानमन्त्री केपी ओलीलाई भ्रष्टाचारी भनेर फेसबुकमा स्ट्याटस लेख्ने एक युवकलाई प्रहरीले पक्राउ गरी विद्युतीय कारोबार ऐन (साइबर अपराध)को मुद्दा चलाएको छ । फेसबुकमा आलोचना गरेकै आधारमा बाजुरा खप्तड छेडेदह घर भएका २१ वर्षीय रमेशबहादुर रावलविरुद्ध प्रहरीले मुद्दा चलाएको हो । गत ३२ साउनमा पक्राउ परेका उनी मंगलबार जिल्ला अदालत, काठमाडौंको आदेशमा धरौटीमा छुटेका छन ।
रावल सिन्धुपाल्चोकको बाह्रबिसेस्थित किस्टोन अस्पतालका कर्मचारी हुन् । बाह्रबिसे प्रहरीले उनलाई पक्राउ गरी साइबर ब्युरोलाई बुझाएकोमा ब्युरोले सोमबार सरकारी वकिल कार्यालयमार्फत मुद्दा दायर गरेको हो । प्रहरीका अनुुसार उनले फेसबुकमा प्रधानमन्त्री ओलीको फोटो राखेर ‘यही हो देश लुट्ने, सही हो कि गलत साथीहरू, भ्रष्टाचारकी कुलदेवी, भ्रष्टाचारका महादेव’ भनेर लेखेका थिए ।
त्यसविरुद्ध अजितकुमार लामाले प्रहरीमा उजुरी दिएका थिए । सोही आधारमा प्रहरीले सार्वजनिक घृणा फैलाउने काम गरेको भन्दै प्रहरीले मुद्दा दायर गरेको हो । पक्राउ परेका युवकले आफूलाई काठमाडौं महानगरपालिकाका मेयर बालेन शाह मन पर्ने र शाहको समर्थनमा बनाइएका पोस्टहरू आफूले सेयर गरेको बताएका छन ।
यसअघि गत १० भदौमा प्रधानमन्त्री ओली र कांग्रेस सभापति शेरबहादुर देउवाविरुद्ध नाराबाजी गरेकै आधारमा प्रहरीले तीन युवकलाई पक्राउ गरी शान्तिविरुद्धको कसुरमा मुद्दा चलाएको थियो । सर्वत्र दबाबपछि उनीहरू चौथो दिनमा जिल्ला प्रशासन कार्यालयबाट धरौटीमा छुटेका थिए । यसरी फेसबुकमा आलोचना र नाराबाजी गरेकै आधारमा मुद्दा चलाइनु र धरपकड गरिनु लोकतन्त्रकै उपहास भएको भन्दै अहिले सामाजिक संजाल र संसदमा समेत व्यापक आलोचना गरिएको छ ।
सरकारबाट दमन सुरु भएको भन्दै आरोपित युवकहरुका आफन्तले प्रहरीप्रति पनि असन्तुष्टि जनाएका छन । एकातिर प्रधानमन्त्री वा मन्त्रीमाथि टिकाटिप्पणी वा आक्रोश पोख्नेहरुलाई धमाधम पक्राउ गर्दै मुद्या चलाइन थालिएको छ भने प्रहरी प्रमुखकै जिब्रो थुत्नु पर्ने अभिब्यक्ति दिने र मन्त्री र मन्त्रालयको मोलमोलाई गरी लिलामीमा राख्ने मन्त्रीहरु भने खुलमखुल्ला झण्डा हल्लाउदै हिँडिरहेका छन् ।
प्रहरी प्रमुखकै जिब्रो थुत्नु पर्ने अभिब्यक्ति दिने मन्त्रीलाई न सरकारले पक्राउ गर्यो न कुनै मुद्या चलाएको छ । नेपाल प्रहरीका महानिरीक्षक वसन्तबहादुर कुँवरको जिब्रो थुत्नु पर्ने मन्त्री सञ्चार तथा सूचना प्रविधिमन्त्री पृथ्वीसुब्बा गुरुङ अहिले पनि शानले मन्त्रीको झण्डा हल्लाएर हिडिरहेका छन् । यद्यपी संसदमै उनको राजीनामा मागिएको छ ।
मंगलबार नेपाली कांग्रेसका केन्द्रिय सदस्य एवं प्रतिनिधि सभा सदस्य शंकर भण्डारीले पृथ्वीसुब्बा गुरुङलाई बर्खास्त गर्न माग गरेका छन् । नेता भण्डारीले मन्त्री गुरुङले सार्वजनिक स्थलमा प्रहरी संगठनका प्रमुखलाई अपशब्द प्रयोग गरी अभिव्यक्ति दिएको भन्दै उनको बर्खास्तीको माग गरेका हुन् । यस्तै पूर्व प्रहरी प्रमुखहरुको संगठनले समेत मन्त्री गुरुङलाई तत्काल कारबाही गर्न माग गरेका छन् ।
मन्त्री गुरुङले केही दिनअघि पोखरामा आयोजित पत्रकार सम्मेलनमा भनेका थिए, ‘प्रहरीको आईजीपीले के भन्यो ? म कानुन लागू गर्दिन, हुँ गर्छ । त्यस्तो बोल्न पाउने कि नपाउने ? त्यसको जिब्रो थुत्नुपर्थ्यो, मैले भन्दाखेरी,’– उनले भनेका थिए । उनको यो अभिब्यक्तिप्रति प्रहरीका पूर्वप्रमुखहरुले समेत आपत्ति जनाउँदै विज्ञप्ती निकालेका छन् । यता स्वयं मन्त्री गुरुङले भने प्रधानमन्त्रीसंग पनि यस विषयमा कुरा भएको बताएका छन् ।
आफूलाई प्रधानमन्त्रीले यस्ता कुरा नबोल्न, बोलीको ख्याल गर्न भनेको र उनको सुझावलाई आफूले सकारात्मकरुपमा लिएको गुरुङले बताएका छन् । तर चौतर्फी आलोचना भइरहँदा र राजीनामा मागिरहँदा पनि उनले अहिलेसम्म माफी भने मागेका छैनन् । यस्तै गण्डकी प्रदेशका निवर्तमान मन्त्री दिपक मनाङ्गेले मन्त्री पद नै लिलामीमा राखेका थिए ।
मन्त्रिपरिषद् पुर्नगठनमा उनको भागमा वन मन्त्रालय परेपछि उनले वन मन्त्रालयमा बजेट नहुने भन्दै सो मन्त्रालय बिक्रीमा राखेको सार्वजनिक अभिब्यक्ति दिएका थिए । यो अभिब्यक्तिको संसदमा समेत विरोध भएको थियो । तर उनका विरुद्ध सरकारले सामान्य स्पष्टिकरण समेत सोध्न सकेको छैन् ।
