२१ भदौ, विराटनगर ।
फ्रान्सको राजधानी पेरिसमा हालै सम्पन्न ओलम्पिक-२०२४ अन्तर्गत पौडीतर्फ सहभागी भएका दक्षिण कोरियाका खेलाडीलाई समर्थन गर्दा अस्ट्रेलियाका प्रशिक्षकले जागिर गुमाउनु परेको छ ।
पौडीको ४०० मिटर फ्रिस्टायलमा कोरियन खेलाडी किम वु मिनलाई ‘गो कोरिया’ भन्ने प्रतिक्रियासहित समर्थन गरेको भन्दै अस्ट्रेलियन ओलम्पिक कमिटीले माइकल पाल्फ्रेलाई पदबाट बर्खास्त गरेको हो ।
शुक्रबार (आज) कमिटीले विज्ञप्ति जारी गरेर पाल्फ्रेलाई सम्झौताविपरीत काम गरेको भन्दै जागिरबाट निकालेको हो ।
पाल्फ्रेले प्रतियोगिता हुनुअघि कोरियन टिभीसँगको कुराकानीमा कोरियाका मिनले जित्नेमा विश्वस्त रहेको सुनाउँदै ‘गो कोरिया’ भनेका थिए ।
जबकि, उक्त स्पर्धामा अस्ट्रेलियाकै साम सर्ट र इलिजहा विनिङ्टोन पनि प्रतिस्पर्धी थिए । उक्त स्पर्धामा विनिङ्टोनले रजत पदक जिते भने सर्ट चौथोमा सीमित बने । अस्ट्रेलियन प्रशिक्षक पाल्फ्रेले समर्थन गरेका किमले तेस्रो हुँदै कांस्य जिते । उक्त स्पर्धामा जर्मनीका लुकास मार्टेन्सले पहिलो हुँदै गोल्ड मेडल जितेका थिए ।
प्रतियोगितालगत्तै अरूले मेडल पाउँदा प्रशिक्षक पाल्फ्रेले भने स्पर्धा सकिएको झन्डे डेढ महिनापछि ‘हरुवा’ साबित हुनुपरेको छ ।
‘सम्झौताविपरीत काम गरेका कारण अस्ट्रेलियन स्विमिङबाट माइकल पाल्फ्रेको जागिर खारेज भएको छ,’ अस्ट्रेलियाको खेल मन्त्रालय मातहतको निकायले शुक्रबार भनेको छ ।
