२३ भदौ , काठमण्डौ ।
नेपालमा सरकार तथा निजी क्षेत्रले घोषणा गरेका पुरस्कार नै खेलाडीहरू लामो समयसम्म नपाएका खबरहरू हामीले सुन्दै आएका छौं । खेलाडीका लागि दिने भनेर घोषणा गरिएका पुरस्कार राशिमा पनि कटौती गरिएको घटनाहरू पनि छन् । नेपाली खेलक्षेत्रको प्रवद्र्धनका लागि कहीँकतै आशाजनक ठाउँ नरहेको निष्कर्षसहित धेरै खेलाडी पलायन पनि भएकै छन् ।
तर, ओलम्पिकमा नेपालका लागि इतिहासमै पहिलो पदक जितेकी तेक्वान्दोकी पलेशा गोवद्र्धनप्रति सरकार र निजी क्षेत्रले देखाएको सद्भावले पुनः खेलजगत ब्युँताउने प्रयास गरेको छ । फ्रान्सको राजधानी पेरिसमा भएको पारा ओलम्पिक खेलकुदमा नेपाललाई ऐतिहासिक पदक दिलाएकी पलेशालाई अहिले सम्मान र पुरस्कार थाप्न भ्याइनभ्याइ छ ।
पलेशाले भदौ १४ गते के–४४ वर्गअन्तर्गत महिला ५७ केजीमुनिको स्पर्धामा पलेशाले सर्वियाकी मारिजा मिचेभलाई १५–८ ले पराजित गर्दै कास्य जितेकी थिइन् । यसअघि नेपाली खेलकुदमा एसियाली खेलकुद प्रतियोगितामा प्राप्त दुई रजत पदक नै सर्वोच्च थियो । तर, २१ वर्षीया पलेशाले ओलम्पिकमा पदक जित्ने नेपालको सपना पूरा गरेकी थिइन् ।
ओलम्पिकमा पाइला चालेको ६ दशकपछि नेपालले पदक पाएको थियो । समग्रमा सन् १९६४ देखि ओलम्पिक खेल्न थालेको नेपालले मेडल जित्न ६० वर्ष नै कुर्नुपरेको थियो । हुन त सन् १९८८ को सोल ओलम्पिकमा नेपालका विधान लामाले पदक जितेका थिए । तर त्यो बेला तेक्वान्दो प्रदर्शनी खेल मात्र भएकोले उनको पदकले मान्यता पाएन ।
हालसम्म १६औं पटक ओलम्पिकमा सहभागिता जनाएको नेपालको मेडल विवरण शून्य थियो । तर, सहभागितामै रम्दै आएको नेपालको ओलम्पिक यात्रामा पदकको सपना पूरा गर्ने काम पारा तेक्वान्दो खेलाडी पलेशाबाट सम्भव भएको हो । ऐतिहासिक रूपमा पदक जितेकी पलेशा, उनका प्रशिक्षक कविराज नेगी लामासहित पारालिम्पिकमा सहभागी नेपाली टोली बुधबार स्वदेश फर्किएको थियो ।
त्रिभुवन विमानस्थलमा ओर्लिनासाथ पलेशालाई सम्मानका साथ नगर परिक्रमासहित भव्य स्वागत गरिएको थियो । त्यसयता उनलाई सम्मान थाप्न भ्याइनभ्याई छ । सुरुमा राष्ट्रिय खेलकुद परिषद्ले पलेसालाई आफ्नो प्रांगणमा भव्य स्वागतसहित सम्मान गरेको थियो । करिब डेढ घण्टा चलेको कार्यक्रमपछि पलेसा काठमाडौं महानगरपालिकाले नगदसहित राखिएको सम्मान थाप्न पुगिन् ।
बुधबार साँझ राष्ट्रपति रामचन्द्र पौडेलले उनको सम्मान गरेका थिए । त्यसपछि बालुवाटारमा प्रधानमन्त्री केपी ओलीले उनको सम्मान गरेका थिए । लगत्तै पूर्वप्रधानमन्त्री पुष्पकमल दाहाल ‘प्रचण्ड’ ले पनि पलेशालाई सम्मान गरे । नेपाललाई पहिलोपटक पारा ओलम्पिकमा पदक दिलाउने पलेशालाई सरकारले ६५ लाख रुपैयाँ पुरस्कार दिने भएको थियो ।
त्यसमाथि प्रधानमन्त्री ओलीले कर छुट नै गरेर पलेशालाई सम्मानस्वरुप पुरस्कार दिने प्रतिबद्धता जनाएका थिए । यस्तै, एनसेलले १० लाखसहित सम्मान गर्ने घोषणा गरेको थियो । पलेशालाई १० लाख दिँदा अरू सहभागी पारा खेलाडी तथा प्रशिक्षकलाई थप १० लाख रुपैयाँसहित सम्मान गर्ने घोषणा गरेको थियो । त्यससँगै काठमाडौं महानगरपालिकाले पलेशालाई पाँच लाख नगदसहित सम्मान गरेको थियो ।
साथै, पलेशाका प्रशिक्षक लामालाई तीन लाख नगदसहित महानगर प्रमुख बालेन्द्र शाह र उपप्रमुख सुनिता डंगोलले सम्मान गरेका थिए । उनलाई नेपाल उद्योग वाणिज्य महासंघले पलेशालाई रु तीन लाख, प्रशिक्षक लामालाई रु एक लाख पच्चीस हजार र व्यवस्थापक रामचन्द्र श्रेष्ठलाई पचहत्तर हजार रुपैयाँसहित सम्मान गरेको थियो ।
हालैमात्र समाजसेवी राजी राणाले ऐतिहासिक ओलम्पिक पदक विजेता पारा तेक्वान्दो खेलाडी पलेशा गोवर्धनलाई चार लाख रुपैयाँ नगद पुरस्कार प्रदान गरिन् । खेलकुदमा रुचि राख्ने र खेलाडीहरुलाई माया गर्ने समाजसेवीका रूपमा परिचित राणाले प्रशिक्षक लामालाई एक लाख रुपैयाँ नगद पुरस्कार प्रदान गरेकी थिइन् ।
यता, कान्तिपुर टेलिभिजनले आफ्नो प्रमोटिङ पार्टनरका रूपमा पलेशालाई अनुबन्धित गरेको छ । कान्तिपुर टेलिभिजन, पलेशा र नेपाल तेक्वान्दो संघबीच भएको त्रिपक्षीय सम्झौतामा तेक्वान्दो संघको क्यालेन्डरमा समावेश भएका प्रतियोगितालाई कान्तिपुर टेलिभिजनले प्रत्यक्ष प्रशारण गर्नेछ । २१ वर्षीया पलेशा हाल चीनमा आर्किटेक्चर अध्ययन गरिरहेकी छिन्। उनले पुरस्कारको रकम आफ्नो अध्ययनमा खर्चिने बताएकी छन् ।
