२३ भदौ, काठमाडौं ।
ललितपुरमा जारी एन्फा महिला लिगमा कोशी प्रदेशले लगातार तेस्रो जित निकालेको छ । आइतबार सातदोबाटोस्थित एन्फा कम्प्लेक्समा भएको खेलमा कोशीले कर्णाली प्रदेशलाई ४-० ले हराएको हो ।
कोशीको जितमा पूर्णीमा राईको दुई गोल गर्दा समीक्षा मगर र प्रतीक्षा राईले दुई गोल थपिन् । पूर्णीमाको गोलमार्फत कोशीले पहिलो हाफ १-० को अग्रता लिएको थियो ।
तर, ६७औं मिनेटमा समीक्षाले गोल गर्दै अग्रता २-० मा पुर्याइन् । समीक्षाको जारी लिगमा यो चौथो गोल हो । त्यसको पाँच मिनेटपछि नै पूर्णीमाले व्यक्तिग दोस्रो र टोलीका लागि तेस्रो गोल गरिन् ।
७५औं मिनेटमा प्रतीक्षाले अर्को गोल थप्दै कोशीलाई सानदार जित दिलाइन् । यससँगै कोशी प्रदेशले लिगमा अपराजित यात्रालाई कायमै राखेको छ ।
शीर्ष स्थानमा रहेको कोशीले तीन खेलबाट नौ अंक पुर्याएको छ । यसअघि कोशीले वालिङलाई ४-० गोल र बागमती युवा क्लबलाई २-१ गोलले पराजित गरेको थियो । कर्णालीसँग भने एक अंक छ ।
