२४ भदौ , एजेन्सी ।
इरानले रुसलाई छोटो दूरीमा प्रहार गर्ने ब्यालिस्टिक क्षेप्यास्त्र दिएको अमेरिकी र अन्य पश्चिमा गुप्तचर निकायहरूले जनाएका छन् । रुसले ती क्षेप्यास्त्र युक्रेन युद्धमा प्रयोग गर्ने उनीहरूको भनाइ छ । ती क्षेप्यास्त्र इरानले कहिले आपूर्ति गरेको हो, स्पष्ट छैन । तर, अमेरिकी अधिकारीहरूलाई उधृत गर्दै वाल स्ट्रिट जर्नलले सो खबर प्रकाशित गरेको छ ।
पछिल्लो समय युक्रेनले रुसी भूमिमा प्रवेश गरी करिब १ हजार वर्गकिमि क्षेत्र कब्जा गरेपछि रुसलाई धक्का लागेको छ । र, आउँदो हिउँदमा युक्रेनले भारी रुसी आक्रमण हुने अपेक्षा गरेको छ। युक्रेनी राष्ट्रपति भ्लादिमिर जेलेन्स्कीले तत्काल थप हवाइ प्रतिरक्षा हतियार आफूहरूलाई आवश्यक पर्ने बताएका छन् ।
इरानले यसअघि रुसलाई ड्रोन उपलब्ध गराएको थियो । तर, इरानका राष्ट्रसंघीय प्रतिनिधिले रुसलाई क्षेप्यास्त्र नदिइएको बताएका छन् । रुसका तत्कालीन रक्षामन्त्री सेर्गेइ सोइगु गत वर्ष सेप्टेम्बरमा इरान भ्रमणमा गएका थिए । त्यसैबेलादेखि क्षेप्यास्त्र आपूर्तिका लागि वार्ता सुरु भएको अनुमान गरिएको छ ।
रुसले यसअघि उत्तर कोरियाबाट पनि तोपका गोला तथा क्षेप्यास्त्रका पार्टपुर्जा प्राप्त गरेको खबर प्रकाशित भएका थिए ।
