२५ भदौ, विराटनगर ।
आगामी दुई वर्षपछि क्यानडा, मेक्सिको र अमेरिकामा संयुक्त रूपमा आयोजना हुने फिफा विश्वकप फुटबलको छनोट खेलअन्तर्गत बुधबार बिहानका राति दक्षिण अमेरिकी राष्ट्रहरूले प्रतिस्पर्धा गर्दै छन् ।
साविक विजेता अर्जेन्टिना, सर्वाधिक धेरै पाँच पटकको विजेता ब्राजिल र पहिलो संस्करणको विजेता उरुग्वेजस्ता राष्ट्रले छनोट खेल खेलिरहेका छन् ।
भोलि बिहानका राति २ः१५ बजे अर्जेन्टिनाले कोलम्बियासँग खेल्ने छ । कोलम्बिया र अर्जेन्टिनाले गत जुलाईमा कोपा अमेरिकाको उपाधि भिडन्तमा प्रतिस्पर्धा गरेका थिए, जसको अतिरिक्त समयमा गोल गर्दै अर्जेन्टिनाले उपाधि जितेको थियो । दुई महिनापछि कोलम्बिया र अर्जेन्टिनाले फेरि एकपटक खेल्न आँटेका हुन् ।
अर्जेन्टिना तालिकाको शीर्ष स्थानमा छ भने कोलम्बियाले तेस्रो स्थानमा रहेर पछ्याइरहेको थियो । कप्तान लियोनल मेसी अर्जेन्टिनी टोलीमा नभएका कारण त्यसको फाइदा उठाउने दाउमा कोलम्बिया छ । जेम्स रोड्रिग्वेज सम्मेलित कोलम्बियाले हालै सम्पन्न कोपा अमेरिकाको फाइनल खेलमा अर्जेन्टिनालाई हम्मेहम्मे पारेको थियो ।सन् २०२६ को विश्वकप छनोटका ६ खेल खेल्दा एउटा पनि खेल नहार्ने टोली हो । अरू टोलीले हार खेपे पनि उसले ७ खेलमा १३ अंक जोडेर तालिकाको तेस्रो स्थान हासिल गरेको छ ।
यस्तै बुधबार बिहानको अर्को खेलमा ब्राजिलले पराग्वेसँग खेल्दै छ । ब्राजिलका लागि विश्वकप छनोटको खेलमा मात्र नभई कोपा अमेरिका पनि निराशाजनक रह्यो । नौ पटकको कोपा विजेता ब्राजिल यसपालि क्वार्टरफाइनलबाटै बाहिरियो । विश्वकप छनोटमा ब्राजिल तेस्रो स्थानमा छ । उसले सात खेलमा १० अंक जोडेको छ ।
आगामी विश्वकपमा साउथ अमेरिकाबाट ६ टोली सीधै छनोट हुँदा एउटा टोलीले अन्तरमहादेशीय प्ले अफ खेल्न पाउने छ ।
७ सेप्टेम्बर २०२३ बाट दक्षिण अमेरिकाका १० राष्ट्रहरूले २०२६ को विश्वकपमा छनोट हुनेगरी खेलहरू खेलिरहेका छन् । सेप्टेम्बर २०२५ सम्ममा यहाँबाट ६ टोली छानिने छन् भने एउटा टोलीले अन्तरमहादेशीय प्ले अफ खेल्न पाउने छ ।
आज हुने खेलहरू (नेपाली समयअनुसार) :
१. कोलम्बिया भर्सेस अर्जेन्टिना- बुधबार बिहान २ः१५ बजेदेखि
२. इक्वेडर भर्सेस पेरु- बुधबार बिहान २ः४५ बजेदेखि
३. चिली भर्सेस बोलिभिया- बुधबार बिहान २ः१५ बजेदेखि
४. भेनेजुएला भर्सेस उरुग्वे- बुधबार बिहान ३ः४५ बजेदेखि
५. ब्राजिल भर्सेस पराग्वे- बुधबार बिहान ६ः१५ बजेदेखि
