२६ भदौ, महोत्तरी ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले अहिले देश माओवादीकै एजेन्डामा चलिरहेको दाबी गरेका छन् । महोत्तरी रामगोपालपुरमा आयोजित एक कार्यक्रममा बोल्दै भने, ‘अहिले मुलुक माओवादीकै एजेन्डामा चलिरहेको छ ।’
प्रचण्डले माओवादीप्रति देशैभरि आकर्षण बढ्न थालेको बताउँदै पार्टीले लिएको एजेन्डा र त्यसकै आधारमा पार्टी नेतृत्वको सरकारले गरेका कामका कारण पार्टीप्रति आकर्षण देखिएको बताए ।
उनले भने, ‘पहिचानका पक्षमा लड्ने पार्टीको रूपमा माओवादी केन्द्र स्थापित भएकै छ, थप सुशासन, सामाजिक न्याय र समृद्धिका लागि हाम्रो पार्टीले अघि सारेको सुस्पष्ट एजेन्डाका कारण अहिले देशैभरि फेरि एकपटक माओवादी केन्द्रप्रति आकर्षणको लहर पैदा भएको छ ।’
राजनीतिक हिसाबले अहिले मुलुक माओवादीकै एजेन्डामा चलिरहेको र आफ्नो पार्टी सरकारमा जाँदा हरेकपटक नयाँनयाँ काम गरेकाले अन्य पार्टीभन्दा माओवादी केन्द्र नै अब्बल रहेको उनले बताए ।
