२९ भदौ , एजेन्सी ।
ब्राजिल भन्नासाथै उत्कृष्ट फुटबल खेल्ने र महान खेलाडी पेलेको देश भनेर चिनिन्छ । साथै ब्राजिललाई फुटबलको पर्याय पनि भनिन्छ । तर, केही दशकदेखि ब्राजिल यो भनाईभन्दा विपरित दिशामा गइरहेको छ ।
पेले, रोमारियो, रोनाल्डो, रोबिन्हो, रोनाल्दिन्हो जस्ता महान खेलाडीले ब्राजिली फुटबलको उँचाई बढाए । तर, अहिले खोई त्यो प्रदर्शन, भन्न थालेका छन् ब्राजिलका समर्थकहरु । यद्यपि, अहिले पनि ब्राजिलका सयौं खेलाडी प्रत्येक वर्ष युरोपमा खेल्न जान्छन् ।
नेयमार जुनियरले पेरिस सेन्ट जर्मेन र बार्सिलोनामा खेले । नयाँ प्रतिभावान खेलाडी भिनिसियस जुनियर २०१८ मा रियल मेड्रिड पुगेका थिए । एन्ड्रीक गत वर्ष रियल मेड्रिडमा आवद्ध भए । प्रिमियर लिगमा खेल्नेहरू डगलस लुृइज, लुकास पाक्वेटा, जोआओ गोमेज, बु्रनो गुल्मारेज, रिचार्लिसनले इंग्ल्यान्डमा मोटो कमाइ गरिरहेका छन् ।
यी खेलाडी क्लबका लागि भने मरिमेटेर खेल्छन् तर, ब्राजिलका लागि खेल्दैनन् । यो आरोप पनि उनीहरुमाथि लागिरहेको छ । यस्तोमा आगामी दुई वर्षपछि मेक्सिको, क्यानडा र अमेरिकाले संयुक्त रूपमा २३औं संस्करणको फिफा विश्वकपको आयोजना गर्दैछन् ।
विश्वकपको इतिहासमै पहिलोपटक ४८ टोलीको सहभागितामा खेलाइने उक्त फुटबलको महाकुम्भमा १० वटा दक्षिण अमेरिकी राष्ट्रहरूले प्रतिस्पर्धा गरिरहेका छन् । जसमा सर्वाधिक धेरै पाँच पटकको विश्वविजेता ब्राजिलको अवस्था भने दयनीय छ ।
यसअघि शीर्ष स्थानमा रहेर विश्वकपमा छनोट हुँदै आएको ब्राजिल यसपटक भने संघर्षरत अवस्थामा छ । हालसम्म आठ खेल खेलिसकेको ब्राजिल चार खेलमा हार, तीन खेलमा जित र एक खेलमा बराबरी खेल्दै १० अंक जोडेको छ ।
अर्जेन्टिना, कोलम्बिया, उरुग्वे र इक्वेडरपछि अंक तालिकाको पाँचौं स्थानमा छ, ब्राजिल । यसअघि सन् २०२२ मा भएको कतार विश्वकप र त्यसभन्दा अगाडिको रसिया विश्वकपमा दक्षिण अमेरिकी राष्ट्रहरूमध्ये शीर्ष स्थानमा रहेर ब्राजिल छानिएको थियो ।
हुन त ब्राजिल फिफा विश्वकपका हरेक संस्करणमा छनोट हुने एकमात्र राष्ट्र हो । विश्वकपको इतिहासमा सबैभन्दा सफल टोली ब्रालिलबिना कुनै विश्वकप भएका छैनन् । सन् १९३० देखि सन् २०२२ सम्मका सबै विश्वकपमा सहभागिता जनाएको ब्राजिलले आफ्नो उपस्थितिलाई बलियो इतिहासका रूपमा सुरक्षित गरेको छ ।
सन् १९५८ र १९६२ मा लगातार दुई पटक १९७०, १९९४ र २००२ मा गरी ब्राजिल कुल पाँच पटक विश्वकप विजेता बनेको छ । दुईचोटी फाइनल पुगेर पनि उपाधि जित्नबाट बञ्चित भएको ब्राजिल दुई पटक तेस्रोमा सीमित बनेको थियो ।
पछिल्लो पटक सन् २००२ मा विश्वविजेता बनेयता ब्राजिल सन् २०१४ मा जर्मनीसँग हारेर चौथो बनेको थियो । जर्मनीसँगको ७–१ गोलान्तरको हार ब्राजिलका लागि सबैभन्दा ठुलो हार थियो । त्यसबीचका विश्वकपको क्वार्टरफाइनलबाट अगाडि बढ्न सकेको छैन, ब्राजिल ।
सन् २००२ को विश्वकप जितेपछि ब्राजिल सन् २००६ को विश्वकपका लागि पहिले नै छनोट भएको थियो । किनभने फिफाले नियम परिवर्तन गर्दै विश्व कपको विजेताले स्वतः अर्को प्रतियोगिता खेल्ने नियम थियो । ब्राजिल सर्वाधिक दुई पटक विश्वकप आयोजना गर्ने राष्ट्र पनि हो ।
ब्राजिलले सन् १९५० र २०१४ मा विश्वकप आयोजना गरेको थियो । ब्राजिल विश्वकपमा सार्वधिक गोल गर्ने टोली हो । ब्राजिलले २३७ गोल गरेको छ । जर्मनीले २३२ गोल गर्दा साविक विजेता अर्जेन्टिनाले १५२ गोल गरेको छ ।
विश्वकपको ट्रफी अहिलेसम्म युरोप र दक्षिण अमेरिकाले मात्र अहिलेसम्म उचालेका छन् । युरोपले १२ र दक्षिण अमेरिकी टिमले १० पटक विश्वकप जितेका छन् । युरोपका १७ देश उपविजेता बन्दा दक्षिण अमेरिकी राष्ट्रहरू पाँच पटक ‘रनर अप’ बनेका छन् ।
युरोपका जर्मनी र इटाली चार–चार पटक विश्वविजेता बन्दा फ्रान्सले दुई र स्पेन र इंग्ल्यान्डले एक–एक पटक उपाधि जितेका छन् । दक्षिण अमेरिकी राष्ट्र ब्राजिलले पाँच पटकको विजेता ब्राजिल हो । त्यसबाहेक अर्जेन्टिनाले तीन र उरुग्वे दुई पटक विश्वविजेता बनेका छन् ।
