२९ भदौ, काठमाडौं ।
पूर्वप्रधानमन्त्री एवम् नेपाल समाजवादी पार्टीका अध्यक्ष डा. बाबुराम भट्टराईले देशमा पठन संस्कृति लोप हुँदै गएको बताएका छन् । शनिबार काठमाडौंमा आयोजित एक कार्यक्रममा भट्टराईले भूमिगत कालमा पञ्चायतविरुद्ध लड्दा कांग्रेस, कम्युनिस्ट सबै जेलमा हुँदा पनि पढ्ने गरेको तर अहिले अध्ययन गर्ने संस्कृति हराइरहेको बताएका हुन् ।
‘हिजोका हाम्रा साथीहरू त्यत्रो भूमिगत कालमा पञ्चायतविरुद्ध लड्दा कांग्रेस, कम्युनिस्ट सबै साथीहरू जेलमा पर्दा पनि सँगै अध्ययन गर्ने बानी थियो । पछि हामी जनयुद्धमा जाँदा पनि त्यत्रो मेहनत गरेर पढ्थ्यौं,’ उनले भने ।
भट्टराईले अहिले राजनीतिक दलका नेता देखि कार्यकर्तासम्ममा पठन संस्कृती हराएको बताए । ‘कांग्रेसका साथीहरूले त पढ्नै छोडिहाल्नुभयो । कम्युनिस्टहरू अलि बढी जो पढ्ने हो । कम्युनिस्टहरू पनि अब कुनै खास फरक छैन । उहाँहरूले पनि पढाइलेखाइमा रूचि राख्नुहुन्न,’ भट्टराईले भने ।
वैकल्पिक ढंगले जानुपर्छ भन्नेहरूले अलिअलि मेहनत गर्न खोजे पनि नभइरहेको उनले बताए । ‘हामीले वैकल्पिक ढंगले जानुपर्छ, भन्नेहरु पनि अलिअलि मेहनत गर्न खोजेका छौँ तर हाम्रो पनि अरण्य रोदन जस्तो भइरहेको छ,’ उनले भने ।
