३१ भदौ, इलाम ।
इलामस्थित पशुपतिनगर नाकाबाट नेपालबाट भारततर्फ जाँदै गरेका ११ जना बालकलाई प्रहरीले नियन्त्रणमा लिएको छ । बौद्धधर्म पढ्न भन्दै भारत जाँदै गरेका ती बालकहरूलाई प्रहरीले समातेर राखेको हो ।
१० देखि १३ वर्ष उमेर समूहका ती बालकहरू बौद्धधर्म अध्ययनका लागि जान लागेको उनीहरूले बताएको प्रहरीले जनाएको छ ।
भारतको काँगडास्थित एक विद्यालयमा बौद्धधर्म पढ्ने एड्मिसनका लागि फारम खुलेको र त्यहाँ जान लागेको उनीहरूले बताएको प्रहरीको भनाइ छ ।
अब, उनीहरूका अभिभावकलाई सोधपुछ गरेर मात्र जान दिइने गरी सोधपुछका लागि राखिएको प्रहरीले जानकारी दिएको छ ।
भारत हिँडेका बालकसँग पहिला त्यही स्कुल पढेका केही इलामका र बाहिरी जिल्लाका अन्य व्यक्तिसमेत रहेको बताइएको छ । इलामसहित काठमाडौं, सर्लाहीदेखिका बालक भारत जान पशुपतिनगर पुगेको बताइएको छ ।
