७ असोज, काठमाण्डौ ।
शेयरबजारमा उच्च अंकको गिरावट आएको छ । आइतबार सामान्य बढेको बजार सोमबार भने धराशायी भएकै हो । बजारमापक परिसूचक नेप्से यस दिन ५९.०२ अंकले घटी २५२९.३३ को बिन्दुमा आइपुगेको छ ।
कारोबारमा आएका मध्ये २ सय २९ कम्पनीको शेयरमूल्यमा गिरावट आउँदा १४ कम्पनीको मूल्य भने बढेको छ । एक कम्पनीको मूल्य यथावत् छ । सोमबार हिमालयन हाइड्रोपावर लिमिटेडका लगानीकर्ताले सबैभन्दा धेरै ९.८४ प्रतिशतले कमाएका छन् ।
गुडविल फाइनान्स, समृद्धि फाइनान्स, एनआईसी एशिया फ्ल्कसी क्याप फन्ड र इस्टर्न हाइड्रो पावर लिमिटेडको शेयरमूल्यमा १० प्रतिशतको गिरावट आउँदा नकारात्मक सर्किट लागेको छ । आज सबै समूहको शेयर घटेकोमा विकास बैंक, फाइनान्स, होटल, जलविद्युत्, बीमा, उत्पादन, माइक्रोफाइनान्स, व्यापार समूहको शेयर उच्च अङ्कले ओरालो लागेको छ ।
आज तीन सय २९ वटा कम्पनीका एक करोड ३५ लाख कित्ता शेयर पाँच अर्ब ६६ करोड रुपैयाँमा कारोबार भएका छन् । सबैभन्दा धेरै नेपाल फाइनान्स कम्पनीको २१ करोड रुपैयाँको शेयर किनबेच भयो ।
यसैबीच नेपाल स्टक एक्सचेन्ज (नेप्से) ले सामाजिक सञ्जालका विश्लेषण हेरेर सेयर बजारमा लगानी नगर्न आग्रह गरेको छ । नेप्सेले आज एक सूचना जारी गर्दै यस्तो आग्रह गरेको हो । नेप्सेले नेपालमा हालसम्म कुनैपनि निकायबाट कसैलाई पनि बजार विश्लेषकको रूपमा दर्ता गर्ने वा मान्यता प्रदान गर्ने नगरिएको जनाएको छ ।
फेसबुक, ट्विटर, क्लबहाउस लगायतका सामाजिक सञ्जाल वा आम सञ्चारका माध्यममा त्यस्ता विश्लेषक वा विज्ञका नाममा आउने विश्लेषणलाई मात्र आधार बनाई लगानी गर्दा जोखिममा पर्न सक्ने नेप्सेले सूचनामा उल्लेख गरेको छ । त्यसैले, यथार्थ बुझेर लगानी सम्बन्धी निर्णय गर्न नेप्सेले सबैलाई अनुरोध गरेको छ ।
