११ असोज, एजेन्सी ।
अमेरिकाको न्युर्योकमा मुख्यालय रहेको संयुक्त राष्ट्र संघको ७९ औं महासभा जारी छ । महासभामा विश्वका यसका सदस्यराष्ट्रका सरकार प्रमुख, राष्ट्र प्रमुख तथा प्रतिनिधि महासभामा भाग लिन अमेरिका पुगेका छन् ।
महासभाले जुराईदिएको यो अवसरको विश्वका नेताहरुले भरपूर सदुपयोग गर्ने गरेका छन् । यसरी महासभाको दौरान आफ्ना साइडलाइन भेटवार्ता गरेर देश अनुकुल वातावरण बनाउने कामलाई नेपालको नेतृत्व गर्दै अमेरिका पुगेका प्रधानमन्त्री केपी शर्मा ओली र परराष्ट्र मन्त्री आरजु राणा देउवाले गरिरहेका छन् ।
अमेरिका पुगेदेखि भेटवार्ता र अन्तराष्ट्रिय फोरमहरुमा सहभागिता जाइरहेका ओली र देउवा निक्कै ब्यस्त देखिएका छन् । अहिलेसम्म प्रधानमन्त्रीले एक दर्जन विभिन्न मैत्रीपूर्ण सम्बन्ध भएका देश र विभिन्न अन्तराष्ट्रिय संस्थाका प्रतिनिधिहरुसँग भेटवार्ता गरिसकेका छन् ।
त्यही हाराहारीको भेटवार्तामा परराष्ट्र मन्त्री आरजु पनि ब्यस्त देखिएकी छन् । उनी प्रधानमन्त्रीका हरेक जसो भेटवार्तामा सरिक छिन् भने आफूले समेत एकल रुपमा छुट्टै भेटवार्ता समेत गर्दै आएकी छन् ।
नेपाली प्रतिनिधिमण्डलको नेतृत्व गर्दै अमेरिकामा रहेका प्रधानमन्त्री केपी शर्मा ओली र परराष्ट्रमन्त्री आरजु राणाले विभिन्न मुलुकका आफ्ना समकक्षी तथा संघसंस्थाहरुका प्रतिनिधिहरुसंग भेटवार्ता जारी राख्ने क्रममा प्रधानमन्त्री केपी शर्मा ओली अमेरिकी राष्ट्रपति जो बाइडेनद्वारा आयोजित स्वागत समारोहमा सहभागी भएका छन् ।
राष्ट्रपतिले आयोजना गरेको समारोहमा प्रधानमन्त्री ओली,प्रथम महिला राधिका समेत सहभागी भएको प्रधानमन्त्रीको सचिवालयले जनाएको छ । यस्तै प्रधानमन्त्री केपी शर्मा ओली र संयुक्त राष्ट्रसंघको ७९औँ महासभाका अध्यक्ष फिलेमोन याङबीच पनि भेटवार्ता भएको छ ।
भेटका अवसरमा प्रधानमन्त्री ओलीले अध्यक्ष याङलाई नेपाल भ्रमणको निमन्त्रणा दिएका छन् । यस्तै प्रधानमन्त्री ओली र पाकिस्तानका प्रधानमन्त्री सेहबाज शरिफबीच भेटवार्ता भएको छ ।
भेटमा दुई देशको सम्बन्ध अझ बलियो बनाउने विषयमा छलफल भएको छ । यस्तै दुई पक्षीय व्यापार, लगानी, पर्यटन र संस्कृति प्रवर्धन गर्ने बारे छलफल भएको प्रधानमन्त्रीको सचिवालयले जनाएको छ ।
यस्तै ओलीले चीनका विदेशमन्त्री वाङ यीसँग पनि शिष्टाचार भेट वार्ता गरेका छन् । भेटका अवसरमा प्रधानमन्त्री ओलीले राष्ट्रसङ्घको स्थापना हुनुभन्दा अगाडिदेखि नेपाल–चीन सम्बन्ध कायम भएको बताउँदै प्राचीन ऋषिमुनी र बौद्धमार्गीहरूले जनस्तरमा समेत सम्बन्ध विस्तार गरेको स्मरण गरेको सचिवालयले जनाएको छ ।
चीनका विदेशमन्त्री वाङले नेपाल–चीनको पुरानो छिमेकी भएकाले आपसी सहकार्यलाई बढाउँदै नेपालको समृद्धिको यात्रामा सक्दो सघाउन चीन तयार रहेको बताएका छन् । यसैगरी प्रधानमन्त्री ओलीसँग कतारका प्रधानमन्त्री मोहम्मद बिन अब्दुलरहमान बिन जसिम अल थानी, लाओसका प्रधानमन्त्री सेनोक्साइ सिफानदोनले पनि भेटवार्ता गरेका छन् ।
यसअघि प्रधानमन्त्री ओलीसँग न्युयोर्कमा विश्व बैंक समूहका अध्यक्ष अजय बंगा र अन्तर्राष्ट्रिय विकासका लागि अमेरिकी सहायता संस्था (यूएसएआईडी) का प्रमुख प्रशासक सामन्था पावरले भेटवार्ता गरेका थिए ।
प्रधानमन्त्री ओलीले र विश्व बैंक समूहका अध्यक्ष बंगाले नेपाल र विश्व बैंकबीच सहकार्यको बारेमा कुराकानी भएको थियो । यस्तै प्रधानमन्त्री ओली र सामोआका प्रधानमन्त्री फैमे नाओमी माताफाबीच पनि आज भेटवार्ता भएको छ ।
उनीहरुबीच राष्ट्रसङ्घका लागि सामाओको स्थायी नियोगमा भेटवार्ता भएको हो । प्रधानमन्त्री ओली र बंगलादेशका प्रमुख सल्लाहकार मोहम्मद युनुसबीच पनि भेटवार्ता भएको छ ।
त्यसअघि प्रधानमन्त्री ओलीले फिनल्यान्डका राष्ट्रपति अलेक्जेण्डर स्टबसँग पनि भेटवार्ता गरेका थिए । उनीहरूबीच द्विपक्षीय चासो र आपसी हितका विषयमा कुराकानी भएको प्रधानमन्त्री ओलीको निजी सचिवालयले जानकारी दिएको छ ।
यस्तै प्रधानमन्त्री ओलीसँग संयुक्त राष्ट्र सङ्घको अन्तर्राष्ट्रिय विकास वित्त निकायका उपकार्यकारी प्रमुख निशा विस्वालले भेट गरेकी छन् । यसैगरी प्रधानमन्त्री केपी शर्मा ओेली र कुवेतका राजकुमार एवं प्रधानमन्त्री शेख सबाह अल खलेद अल हमाद अल मुबारक अल सबाहबीच पनि भेटवार्ता भएको छ ।
यसअघि ओलीले भारतका प्रधानमन्त्री नरेन्द्र मोदी, संयुक्त राष्ट्रसंघका महासचिव गुटेरेससंग भेटवार्ता गरेका थिए । त्यसअघि प्रधानमन्त्री ओलीसँग संयुुक्त राष्ट्रसङ्घका मानव अधिकार उच्चायुक्त भोल्कर टर्कले शिष्टाचार भेट गरेका थिए ।
भेटमा मानव अधिकार उच्चायुक्त टर्कले नेपालले शान्ति प्रक्रियालाई अन्तिम रूप दिने विषयसँग सम्बन्धित सत्य निरुपण तथा मेलमिलाप आयोग र बेपत्ता पारिएका व्यक्तिहरूको आयोगसम्बन्धी कानुन पारित भएकामा खुसी व्यक्त गरेका थिए ।
असोज ५ गते अमेरिका पुगेका ओलीले ‘समिट अफ द फ्युचर’को अन्तरक्रियात्मक सत्रलाई अध्यक्षता समेत गरेका थिए । यस्तै परराष्ट्रमन्त्रीले पनि भेटवार्तालाई घनिभूत बनाएकी छन् । उनले दक्षिण कोरियाका विदेशमन्त्री चो तेई–युलसँग साइडलाइनमा द्विपक्षीय वार्ता गरेकी छन् ।
यस्तै, परराष्ट्रमन्त्री राणाले फिलिपिन्सका विदेश सचिव इन्रिक ए. मनालोसँग पनि साइडलाइनमा भेटवार्ता गरेकी थिइन् । यस्तै आरजुले अमेरिकी राज्य विभागका राजनीतिक मामिलाका लागि कार्यवाहक उपसचिव जोन बाससँग समेत भेटवार्ता गरेकी छन् ।
उनले राष्ट्रसंघीय उपमहासचिव तथा ‘यूएन वुमन’की कार्यकारी निर्देशक सीमा समी स्कन्दर बहुससँग समेत भेटवार्ता गरेकी छन् । राणाले महासभा बैठककै दौरान विश्वका मन्त्रीस्तीय बैठकमा समेत सहभागिता जनाएकी छन् ।
कम विकसित मुलुकहरू (एलडीसी) लाई सहयोग बढाउन जी–२० राष्ट्रहरूलाई आग्रह गरेकी छन् । महासभाका दौरान भएको विश्वका शक्तिशाली २० मुलुकहरुको विदेशमन्त्रीस्तरीय बैठकमा एलडीसीको अध्यक्षको हैसियतले बोल्दै परराष्ट्रमन्त्री राणाले एलडीसी मुलुकहरूलाई सहयोग बढाउनको लागि जी–२० मुलुकहरूलाई आग्रह गरेकी हुन् ।
आरजुले समाजवादी अन्तर्राष्ट्रिय वार्षिक अध्यक्ष मण्डलको बैठकलाई समेत सम्बोधन गरेकी छन् । यस्तै परराष्ट्रमन्त्री डा. देउवाले स्पेनका राष्ट्रपति पेड्रो सान्चेजसँग भेट गरेकी छिन्।
त्यस अवसरमा उनीहरुबीच नेपाल र स्पेनबीच आपसी सम्बन्ध थप मजबुत बनाउनेलगायत विषयमा छलफल भएको राणाले सामाजिक सञ्जालमार्फत जानकारी दिएकी छन्। यस्तै, परराष्ट्रमन्त्री राणाले फिलिपिन्सका विदेश सचिव इन्रिक ए. मनालोसँग पनि साइडलाइनमा भेटवार्ता गरेकी थिइन् ।
आरजु र सर्बियाका विदेश मन्त्री मार्को जुरिकबीच पनि भेटवार्ता भएको छ । जुन भेटवार्तामा नेपाल र सर्बियाबीच कूटनीतिक र आधिकारिक राहदानी धारकहरूका लागि भिसा छूटसम्बन्धी एमओयूमा हस्ताक्षर गरेको छ ।
यसबीचमा आरजुले जमर्नी, इन्डोेनेसिया र ब्रुनाइका विदेशमन्त्रीहरुसँग समेत भेटवार्ता गरेकी छन् ।प्रधानमन्त्री र परराष्ट्रमन्त्रीको स्वागतमा आयोजित कार्यक्रम सुरक्षा र ब्यस्ततताका कारण भन्दै स्थगित हुनु बाहेक प्रधानमन्त्री र परराष्ट्र मन्त्री यसअघिका नेपालका प्रधानमन्त्री र परराष्ट्र मन्त्री भन्दा भेटवार्ताका देष्टिकोणबाट निक्कै ब्यस्त देखिएका छन् ।
प्रधानमन्त्री ओली नेतृत्वको टोली भने आगामी असोज १४ गते स्वदेश फर्किने कार्यक्रम रहेको छ ।
