६ मंसिर, काठमाण्डौ।
सरकारले अबदेखि औषधि बेच्नेलाई अनिवार्य सेतो एप्रोन लगाउनुपर्ने नियम लगाएको छ । आउँदो पुस ४ गतेदेखि ’फर्मासिस्ट’ हरूले सेतो ’एप्रोन’ लगाएर मात्र औषधि वितरण गर्नुपर्ने अनिवार्य व्यवस्था लागू गरिएको छ ।
नेपाल फार्मेसी परिषद्ले एक सूचना जारी गर्दै कुनै पनि सामुदायिक फार्मेसी वा अस्पतालका फार्मेसीमा औषधि वितरकका रूपमा कार्यरत फर्मासिस्ट र फार्मेसी सहायकले औषधि वितरण गर्दा नामसहितको सेतो एप्रोन अनिवार्य लगाउनुपर्ने व्यवस्था गरेको हो ।
परिषद्का रजिस्ट्रार सञ्जीवकुमार पाण्डेले फर्मासिस्ट र फार्मेसी सहायकले यसको उल्लङ्घन गरेमा परिषद्को आचारसंहिता पालना नगरेको मानेर नियमानुसार कारबाही गरिने बताएका छन् । उनले भने, ‘ड्रेसकोडको पालना भए÷नभएको परिषद्बाट नियमित अनुगमन हुनेछ । पालना नभएको अवस्थामा परिषद्को नियमावली २०५९ अनुसार कारबाही प्रक्रिया अघि बढाइन्छ ।’
परिषद् ऐनको दफा ९ को उपदफा (क) ले दिएको अधिकार प्रयोग गरी फार्मेसी परिषद्ले फर्मासिष्टले हरियो पृष्ठभूमिमा सेतो रङ्गको अक्षरमा नाम, पद र परिषद् दर्ता नम्बर उल्ल्लेख गरिएको डे«सकोड लगाउनुपर्ने नियम बनाएको छ ।
त्यस्तै, फार्मेसी सहायकले निलो पृष्ठभूमिमा सेतो रङ्गको अक्षरमा नाम, पद र परिषद् दर्ता नम्बरसहितको एप्रोन लगाउनुपर्ने व्यवस्था गरेको हो । ड्रेस विना औषधि पसलमा बसेर काम गरेको पाइए कानून अनुसार कार्वाही गरिने परिषद्का रजिष्ट्रार सञ्जीवकुमार पाण्डेले बताएका छन् ।
उनले औषधि पसलहरुमा फर्मासिस्ट र फार्मेसी सहायकहरुकै उपस्थिति होउन भनेर यस्तो व्यवस्था गर्न लागिएको बताए । परिषद्का अनुसार अब फार्मेसीको औषधि डिस्पेन्सिङमा बस्ने फर्मासिस्टले सेतो एप्रोनको बायाँ तर्फ माथिल्लो खल्ती माथि हरियो पृष्ठभूमिमा सेतो रंङको अक्षरमा नाम पद र परिषद् दर्ता नम्बर उल्लेख भएको नेम ट्याग राख्नु पर्नेछ ।
रजिष्ट्रार पाण्डेले भनेका छन्, ‘यसले औषधि पसलमा फर्मासिस्ट छन् कि छैन ? को फर्मासिस्टले औषधि दियो ? औषधि फर्मासिस्टले दियो कि फार्मेसी सहायकले भनेर समेत थाहा पाउन सजिलो हुन्छ । यसले औषधि पसलमा गैर फर्मासिस्टहरु कार्यारत हुने अवस्थालाई पनि नियन्त्रण गर्न सजिलो हुन्छ ।’
परिषद्ले ड्रेसकोड कार्यान्वयनका लागि एक महिनाको समयसिमा तोकिएको भन्दै यसको कार्यान्वयन भएको नदेखिए परिषद्को नियमावली २०५९ को परिच्छेद ३ को ३.२ बमोजिम कार्वाही प्रक्रिया अगाडी बढाउने बताएको छ । अहिले कतिपय फार्मेसी पसलले फर्मासिस्ट तथा फार्मेसी सहायकको प्रमाणपत्र भाडामा लिएर सञ्चालन गर्ने गरेका छन् ।
