२३ मंसिर, काठमाण्डौ।
अर्जेन्टिनी सुपरस्टार लिओनल मेसीले मेजर लिग सकर (एमएलएस) कै ‘मोस्ट भ्याल्युएबल’ प्लेयरको अवार्ड जितेका छन् । बार्सिलोना र पेरिस–सेन्ट जर्मेनका पूर्वफरवार्ड मेसी जुलाई २०२३ मा इन्टर मियामी पुगेका थिए ।
उनले नियमित सिजनमा कीर्तिमान ७४ अंक दिलाउन महत्त्वपूर्ण भूमिका निर्वाह गरेका थिए । मियामीको पहिलो उपाधिको रुपमा स्पोर्ट्स शिल्ड जिते पनि उनको टिम गत नोभेम्बरमा एमएलएस कप प्लेअफको पहिलो चरणमै पराजित भएको थियो ।
इन्टर मियामीमा आबद्ध भएपछि पहिलो पूर्ण सिजनमै उनले यो प्रतिष्ठित अवार्ड हात पारेका हुन्। ३७ वर्षीय मेसीले १९ खेलमा सर्वाधिक ३६ गोलको योगदान गरे । जसमा २० गोल गरे भने १६ गोलमा असिस्ट गरे ।
चोटले पिरोलेको सिजन नियमित लिगमा मियामीको लागि १९ खेल र प्लेअफमा दुई खेल मात्रै खेलेर पनि मेसीले एमएलएसकै सर्वोत्कृष्ट खेलाडीको अवार्ड हात पारेका हुन् । मेसीको नेतृत्वमा इन्टर मियामीले नियमित सिजनमा कीर्तिमानी अंक जोड्दै शीर्ष स्थान हासिल ग¥यो।
यद्यपि, प्लेअफको पहिलो चरणमा टोली पराजित भयो। एमएलएसको व्यक्तिगततर्फ सबैभन्दा प्रतिष्ठित मानिने यो अवार्ड मेसीले जित्नु इन्टर मियामीको इतिहासमा पहिलो पटक हो। मेसीको आगमनले एमएलएसमा उनको प्रभाव र योगदानलाई यस अवार्डले थप पुष्टि गरेको छ।
उनले समग्रमा १ हजार ४८५ मिनेट मात्रै खेलेका छन् । उनी एमएलएसमा एक सिजनमै कम्तीमा २० गोल र १५ असिस्ट गर्ने तेस्रो खेलाडी हुन् । यसअघि सन् २०१९ मा लस एन्जलसका कार्लोस भेलाले ३४ गोल र १५ असिस्ट तथा २०१५ मा टोरोन्टोका सेवास्टिन जियोभिन्कोले २२ गोल र १६ असिस्ट गरेका थिए ।
यो अवार्डमा विजेताको घोषणा खेलाडी, टेक्निकल स्टाफ र पत्रकारको मतबाट छनोटबाट गरिन्छ । यसमा मेसीले ३८.४३ प्रतिशत मत पाए भने कोलम्बस क्र्युका कुचो हर्नान्डेजले ३३.७ प्रतिशत मत पाए ।
कोलम्बियाका यी फरवार्डले १९ गोल र ११ असिस्ट गरेका थिए । पोर्टल्यान्ड टिम्बर्सका मिडफिल्डर इभान्डार, डीसी युनाइटेडका क्रिस्टियन बेन्टेके, इन्टर मायामीमा मेसीका सहकर्मी लुइस सुआरेज पनि प्रतिस्पर्धामा थिए ।
यसअघि यो अवार्ड अमेरिकाका पूर्वफरवार्ड ल्यान्डन डोनभान, आयरल्यान्डका रोबी किन, स्पेनका डाभिड भियाले पनि जितेका थिए । मेसीको लागि यो अर्को एक व्यक्तिगत सफलता हो।
उनले बालोन डि’ओर आठपल्ट, फिफा बेस्ट प्लेयर आठपल्ट, स्पेनिस ला लिगाका सर्वोत्कृष्ट खेलाडीको अवार्ड सातपल्ट, युइएफए प्लेयर अफ द इयर, च्याम्पियन्स लिगका सर्वोत्कृष्ट खेलाडी, विश्वकप, क्लब विश्वकप लगायतमा सर्वोत्कृष्ट खेलाडीको अवार्ड जितिसकेका छन् ।
