२३ मंसिर, एजेन्सी ।
जिल्ला अदालत कास्कीले राष्ट्रिय स्वतन्त्र पार्टीका सभापति रवि लामिछानेलाई थप चार दिन हिरासतमा राख्न अनुमति दिएको छ। प्छिल्लो पटक थपिएको १५ दिनको समय शुक्रबार सकिएपछि आज म्याद थपका लागि रविलाई अदालतमा उपस्थित गराइएको थियो ।
सूर्यदर्शन सहकारी ठगीमा अनुसन्धानका लागि जिल्ला प्रहरी कार्यालय कास्कीले उनलाई आइतबार अदालतमा उपस्थित गराएको थियो। प्रहरीले रविलाई अनुसन्धानका लागि थप १३ दिनको समय माग गरेपनि अदालतले ४ दिनको समय दिएको हो ।
कास्की जिल्ला अदालतका सूचना अधिकारी सुरज अधिकारीका अनुसार आइतबार रविलाई थुनामै राखेर अनुसन्धान गर्न प्रहरीलाई ४ दिनको म्याद दिइएको हो । कात्तिक २ गतेदेखि लामिछाने ५१ दिनदेखि हिरासतमा छन्।
यसबीचमा उनीसँग सूर्यदर्शन सहकारी ठगीसँगै बुटवलको सुप्रिम सहकारी, काठमाडौँको स्वर्णलक्ष्मी सहकारी र चितवनको सहारा चितवन सहकारीमा पनि बयान लिइएको छ। अब सानो पाइला सहकारीको ठगीमा अनुसन्धान गर्न पर्सा लैजाने तयारी छ ।
वीरगञ्जस्थित सानो पाइला सहकारी ठगी प्रकरणमा लामिछानेसहित १४ जनाविरुद्ध पर्सा जिल्ला अदालतबाट पक्राउ पुर्जी जारी भएको छ । वीरगञ्जको सानो पाइला सहकारीले करिब ८ सय बचतकर्ताबाट १ अर्ब ३५ करोड रुपैयाँ संकलन गरेको थियो ।
सहकारीले ऐन विपरीत कार्यक्षेत्र बाहिरका व्यक्तिलाई ऋण प्रवाह गरी करिब ९२ करोड रुपैयाँ अपचलन गरेको आरोप छ। प्रहरीको अनुसन्धान अनुसार सहकारीका सञ्चालक समूहले नेचर हब इन्टरनेसनल, नेचर नेष्ट प्रालि, स्प्रिङ वुड रियल स्टेटलगायत कम्पनीहरूलाई ठूलो रकम कर्जा प्रवाह गरेको छ ।
सहकारीका पूर्वसंरक्षक जीबी राईसहित छविलाल जोशी, तिर्थराज लामिछाने, विमला पौडेललगायतका नाममा करोडौं रुपैयाँ कर्जा प्रवाह भएको पाइएको छ। रवि लामिछानेमाथि सहकारीको रकम आफ्नो स्वामित्वमा रहेको गोर्खा मिडियामा लगानी गरिएको आरोप छ ।
चेक अपचलन, सहकारी ठगी, संगठित अपराध र सम्पत्ति शुद्धीकरणको कसुरमा अनुसन्धान भइरहेको प्रहरीले जनाएको छ। सहकारी ठगीमा प्रत्यक्ष संलग्नता नरहेको र गोर्खा मिडियाको सञ्चालक भएकै कारण लामिछानेलाई अनावश्यक रूपमा फसाउन खोजिएको रास्वपाले आरोप लगाएको छ ।
पर्सा प्रहरीका अनुसार सहकारी ठगी प्रकरणमा लामिछानेसहित १४ जनाविरुद्ध थप अनुसन्धान अघि बढाइएको छ । गत वर्ष नै दायर मुद्दामा संसदीय छानबिन समितिको प्रतिवेदनका आधारमा अनुसन्धान पुनः सुरु भएको हो ।
सहकारी ठगीसँगै सम्पत्ति शुद्धीकरण र संगठित अपराधमा पनि अनुसन्धान गरिरहेको प्रहरीले बढीमा पुस ६ गतेसम्म हिरासतमा राखेर अनुसन्धान गर्न सक्छ। लामिछानेसँगै पूर्व डीआईजी छविलाल बन्जाडे जोशी पनि हिरासतमा छन्।
उनीहरु दुवैविरुद्ध एकैसाथ अदालतमा मुद्दा दायर गर्ने प्रहरीको तयारी छ । पछिल्लो समय रविलाई चितवनबाट कास्की ल्याउदा मध्यरातमा अमानवीय व्यवहार गरिएको भन्दै उनले यसको छानविनका लागि मानवअधिकारवादी गुहारेका छन् ।
उनको दल रास्वपाले समेत राष्ट्रिय मानवअधिकार आयोगमा जाहेरी दिँदै रविमाथि भएको घटनाको छानविनको माग गरेको छ । यस्तै मेडिकल व्यवसायी दुर्गा प्रसाईंलाई थप ३ दिन हिरासतमा राख्न अदालतले अनुमति दिएको छ ।
काठमाडौँ जिल्ला अदालतका न्यायाधीश दुर्गा खड्काको इजलासले आइतबार उनलाई थप ३ दिन हिरासतमा राखेर अनुसन्धान गर्न प्रहरीलाई अनुमोदन दिएको हो । प्रसाईंले प्रधानमन्त्री केपी ओलीविरुद्ध भ्रामक प्रचार गरेको आरोपमा पक्राउ परेका उनीमाथि प्रहरीले अनुसन्धान गरिरहेको छ ।
