एजेन्सी,असोज १२
प्रशान्त महासागरको किनारमा रहेको एक विमानस्थलमा अवतरण गर्ने क्रममा शुक्रबार एउटा विमान गम्भीर दुर्घटनामा परेको छ ।
४७ यात्रु बोकेको पपुआ न्यू गिनीको एयर न्यूगिनीको बोइङ ७३७–८०० विमान मोइकोनेसियास्थित चुक विमानस्थलमा अवतरण गर्ने क्रममा चिप्लिएर समुन्द्रमा परेको हो ।
विमान बिहान करिब ९ः३० बजे अवतरण गर्ने तालिका रहेको र अवतरणका लागि आइपुगेको विमान धावनमार्गमा नरोकिई अघि बढेको थियो।
सिधा अगाडि समुन्द्र रहेका कारण विमान समुन्द्रभित्र प्रवेश गरेको बताइएको छ । धावनमार्गमा १६० मिटर दौडिएपछि विमान अगाडिको समुन्द्रमा पुगेको थियो ।
जहाजमा ३६ यात्रु र ११ चालक दल सदस्य थिए। विमानस्थलका अनुसार विमानमा रहेका सबै यात्रु सकुशल रहेको विभिन्न अन्तरराष्ट्रिय समाचार माध्यमहरुले उल्लेख गरेका छन् ।
