१७ माघ,एजेन्सी ।
अमेरिकाको वासिङ्टन डीसीमा अमेरिकन एयरलाइन्सको विमान आकासमै हेलिकप्टरसँग ठोकिएको छ । यो जानकारी संघीय उड्डयन प्रशासनले दिएको हो । बीबीसीका अनुसार यो विषयमा अनुसन्धान भइरहेको छ ।
दुर्घटना स्थानीय समयअनुसार राति ९ बजे रेगन वासिङ्टन राष्ट्रिय विमानस्थलनजिकै पोटोम्याक नदीमाथि भएको हो । रेगन एयरपोर्टले एक्समा लेखेको छ– हालका लागि सबै उडान रोकिएका छन् ।
वासिङ्टन डीसीको आपत्कालीन उद्धार टोली रेगन राष्ट्रिय विमानस्थलमा पुगेको छ । त्यहाँ एक दर्जन एम्बुलेन्स र दमकल देखिएका छन् । डीसी फायर र ईएमएस विभागका अनुसार विमान डीसी हुँदै बग्ने पोटोम्याक नदीमा दुर्घटनाग्रस्त भएको थियो ।
एक्समा लेखेको छ– फायरबोटले नदीमा खोजिरेहका छन् । दुर्घटनामा परेको विमानमा ६० जना यात्रु सवार रहेको बताइएको छ । एक भिडियोमा नजिकैको नदीमाथि विमान र हेलिकोप्टर ठोक्किएर विष्फोट भएको देखिन्छ ।
यो दुर्घटनाको बारेमा राष्ट्रपति डोनाल्ड ट्रंपलाई जानकारी दिइएको छ । यस्तै उपराष्ट्रपति जेडी भान्सले सोशल मीडिया प्लेटफर्म ’एक्स’ मा राहत र उद्यार कार्यमा तिव्रता दिन निर्देशन दिएका छन् र मानिसहरुसंग हर सम्भव सहयोगका लागि आह्वान गरेका छन् ।
संघीय उड्डयन प्रशासनका अनुसार यो दुर्घटना त्यतिबेला भयो जब भिचिटा (कंसास) बाट रवाना भएको एक क्षेत्रीय जेट एयरपोर्ट रनवे नजिकै ल्याडिंगका क्रममा एक सैन्य ब्लाकहक हेलीकप्टरसंग ठोक्किन पुग्यो ।
यो घटनाले १३ जनवरी, १९८२ मा पोटोम्याकमा खसेको एयर फ्लोरिडाको उडानको दुर्घटना सम्झाएको छ, जसमा ७८ यात्रु मारिएका थिए । उक्त दुर्घटना खराब मौसमका कारण भएको भनिएको थियो ।
हालको दुर्घटनामा के कति मानविय क्षति भयो भन्नेमा आधिकारिक जानकारी अहिलेसम्म दिइएको छैन । यता दक्षिण सुडानमा पनि विमान दुर्घटना भएको छ । उक्त विमान दुर्घटना हुँदा कम्तीमा २० जनाको मृत्यु भएको प्रदेशका सूचना तथा सञ्चारमन्त्री गतवेच विपालले बुधबार जानकारी दिएका छन् ।
राजधानी जुबाका लागि उडेको विमान करिब १०ः३० बजे युनिटी राज्यको तेल क्षेत्र नजिकै खसेको थियो । ’विमान विमानस्थलबाट ५०० मिटर टाढा दुर्घटनाग्रस्त भयो । विमानमा २१ जना सवार थिए । अहिले त्यहाँ एक जना मात्र बाँचेका छन्,’ गतवेच विपालले भने ।
ग्रेटर पायोनियर अपरेटिङ कम्पनी (जीपीओसी) ले चार्टर्ड गरेको र लाइट एयर सर्भिस एभिएसन कम्पनीले सञ्चालित उक्त विमान यस क्षेत्रमा नियमित उडानमा रहेको उनले बताए । उनले उक्त दुर्घटनाबाट राज्य सरकार गहिरो दुःखी भएको बताउँदै यसबारे छानबिन गरिने जानकारी दिए ।
