काठमाडौँ,असोज १३
६ महिनामा नै फिल्म युट्युबमा आउने हुँदा किन पैसा तिरेर नेपाली फिल्म हेर्ने ? भन्ने सोचले दर्शकमा जरा गाडिरहेका बेला चलचित्र बनाउनेहरुले नयाँ कुरा सोच्न थालेका छन् ।
हाल प्रदर्शनरत फिल्म ‘इन्टु मिन्टु लण्डनमा’ टिमले फिल्मलाई युट्युबमा नल्याउने घोषणा गरेको छ । निर्देशक रेनाशा वान्तवा राईले फिल्मलाई भिडियो साझेदारी साइट नेटफिक्समा ल्याउने तयारी भइरहेको बताइन् । युट्युब रिलिजले गर्दा फिल्मको व्यापार कम भइरहेको उनको तर्क छ ।
उनले भनिन्, ‘हामी यूट्युबभन्दा नेटफिक्स जस्ता भिडियो साझेदारी साइटमा आउन चाहन्छौं । ६–६ महिनामा फिल्म युट्युबमा रिलिज हुँदा हलको व्यापारलाई धेरै कम गरिरहेको छ । यही कारणले फिल्म यूट्युबमा रिलिज नगर्न लागेका हौं ।’
शुक्रवारबाट दोस्रो सातामा प्रदर्शन आरम्भ गरेको फिल्म ‘इन्टु मिन्टु लण्डनमा’ मा अभिनेत्री साम्राज्ञी आरएल शाह र अभिनेता धिरज मगर प्रमुख भूमिकामा छन् । प्रज्वल सम्सेर जबरा र प्रभु सम्सेर जबरा निर्मित फिल्मले हालसम्म साढे ३ करोड ग्रस कलेक्सन गरिसकेको छ ।
