२४ चैत, विराटनगर । नोबेल टिचिङ हस्पिटल, विराटनगरमा अध्ययनरत एमबिबिएस १६औं ब्याचको आयोजनामा ‘नोबेल स्पोट्र्स फिएस्टा २०२५’ भव्य रूपमा सम्पन्न भएको छ।
चैत्र १५ देखि २२ गतेसम्म सञ्चालन भएको सप्ताहव्यापी महोत्सवमा विभिन्न रोचक तथा प्रतिस्पर्धात्मक खेल विधाहरूको समावेश गरिएको थियो ।
फुटबल, क्रिकेट, भलिबल, कबड्डी, टग अफ वार, टेबल टेनिस, क्यारामबोर्ड र चेसजस्ता खेलहरूले महोत्सवलाई पूर्ण ऊर्जा, उत्साह र खेल भावना प्रदान गरे ।
विद्यार्थी, शिक्षक, चिकित्सक र अस्पतालका कर्मचारीहरूको सक्रिय सहभागिताले नोबेल परिवारबीचको सहकार्य र आपसी सम्बन्धलाई अझ प्रगाढ बनाएको आयोजक विद्यार्थीहरूको भनाइ छ।
समापन समारोहमा प्रमुख अतिथि डा. रीतु बरालले विभिन्न खेल विधामा उत्कृष्ट प्रदर्शन गर्ने टोली तथा खेलाडीहरूलाई पुरस्कार वितरण गरिन्।
उनले खेलकुदमार्फत अनुशासन, एकता र आत्मविश्वासको विकास हुने बताउँदै यस्ता कार्यक्रमले भविष्यका चिकित्सकहरूमा ‘टीम स्पिरिट’ बलियो बनाउने उल्लेख गरिन्।
कार्यक्रममा विद्यार्थीहरूले आकर्षक सांस्कृतिक प्रस्तुतिहरू पनि गरेका थिए। नृत्य, गायन तथा हाँस्यव्यङ्ग्यसहितको विविध मनोरञ्जनले समारोहलाई झनै रंगीन बनायो।
दर्शकदीर्घामा रहेका अभिभावक, प्राध्यापक तथा अस्पताल प्रशासनका प्रतिनिधिहरूले उत्साहपूर्वक सहभागी विद्यार्थीहरूको प्रशंसा गरेका थिए ।
नोबेल टिचिङ हस्पिटल प्रशासनका अनुसार हरेक वर्ष यसरी नै खेलकुद महोत्सवको आयोजना गरिँदै आएको छ।
खेलकुद र सह–पाठ्यक्रम क्रियाकलापलाई शिक्षासँगै समाहित गर्दै आएको नोबेल टिचिङ हस्पिटलको यो पहलले विद्यार्थीहरूको समग्र व्यक्तित्व विकासमा सकारात्मक प्रभाव पार्ने विश्वास लिइएको छ।
