छविलाल जोशी अस्पताल भर्ना, रविलाई कस्तो छ ?

२६ चैत ,  काठमाण्डौ ।

सहकारी ठगी प्रकरणमा भैरहवा कारागार, रुपन्देहीमा रहेका नेपाल प्रहरीका पूर्वडीआईजी छविलाल जोशी अस्पताल भर्ना भएका छन् । स्वास्थ्यमा समस्या भएपछि उनलाई कारागार प्रशासनले अस्पताल लगेको हो ।

कारागार प्रशासनका अनुसार उनलाई भैरहवाकै युनिभर्सल मेडिकल कलेजमा परीक्षणका लागि लगिएको छ । अहिले उनको स्वास्थ्य परीक्षण र उपचार भइरहेको बताइएको छ । उनी पहिल्यैदेखि औषधि सेवन गर्दै आएको पनि कारागार प्रशासनले जनाएको छ ।

उनलाई कस्तो स्वास्थ्य समस्या हो भन्नेबारे केही खुलाइएको छैन । स्वास्थ्यमा समस्या भएपछि उनलाई कारागार प्रशासनले मंगलबार दिउँसो ३ बजेपछि अस्पताल लगेको थियो । जोशीको प्रेसर बढ्ने, शरीरमा चिडचिडाहट हुने लगायत समस्या देखिएका छन्।

जोशी अहिले अस्पतालको क्याबिनमा बसेका छन् । उनी अझैसम्म १÷२ दिन डाक्टरको निगरानीमा नै रहने बताइएको छ । यस्तै जोशीको अन्य रोगहरूको पनि चेकजाँच भइरहेको छ ।

बुटवलको सुप्रिम सहकारी ठगी प्रकरणमा उनलाई रुपेन्देही जिल्ला अदालतले पुर्पक्षका लागि कारागार चलानको आदेश दिएको थियो । त्यसपछि उनी भैरहवा कारागारमा बस्दै आएका छन् ।

उनीविरुद्ध पोखराको सूर्यदर्शन सहकारी, कालिमाटीको स्वर्णलक्ष्मी सहकारी, चितवनको सहारा चितवन सहकारी ठगीमा मुद्दा दायर भएको थियो । यी सहकारीमा भने उनी धरौटीमा छुटेका थिए ।

तर बुटवलको सुप्रिम सहकारी ठगी प्रकरणमा जिल्ला अदालत रुपन्देहीले थुनामा राख्ने आदेशसँगै जोशी विगत ३ महिनादेखि भैरहवा कारागार रहेका छन् । छवि रहेकै कारागारमा राष्ट्रिय स्वतन्त्र पार्टी (रास्वपा)का सभापति रवि लामिछानेलाई पनि राखिएको छ ।

दुवै जनालाई अलग अलग कोठामा राखिएको छ । यसैबीच आज रास्वपाले सचिवालय बैठक बोलाएको छ । रवि लामिछाने जेल चलान भएको २ दिनपछि रास्वपाले सचिवालय बैठक राख्न लागेको हो । रास्वपाका कार्यवाहक प्रवक्ता मनीष झाका अनुसार बैठक अपराह्न ४ बजे केन्द्रीय कार्यालय, वनस्थलीमा बस्नेछ ।

बैठकका मुख्य विषयवस्तु अघिल्लो बैठकको समीक्षा, पार्टी गतिविधि र समसामयिक राजनीतिक घटनाक्रम रहेको उनले जानकारी दिएका छन् । यस्तै पार्टीको अधिवेशन, जनयात्रा कार्यक्रम, प्रदेश हेर्ने पदाधिकारी र केन्द्रीय सदस्यबारे पनि नयाँ निर्णय लिन सकिने रास्वपा नेताहरूले बताएका छन् ।

यता चार दिनअघि चैत १८ गते मात्र रास्वपाले सभापतिको जिम्मेवारीमा फर्काएका रवि भोलिपल्ट १९ गते चितवनमा पार्टीको जनयात्रा कार्यक्रम उद्घाटन गर्ने तयारीमा थिए । तर अघिल्लो दिन उनी पक्राउ परेपछि रास्वपाले मध्यरातमा सचिवालय बैठक राखेर फेरि उपसभापति डीपी अर्याललाई कार्यवाहक सभापति तोक्दै कार्यक्रम नरोक्ने निर्णय गरेको थियो ।

यता रवि नहुँदा चितवनमा गरिएको जनयात्रा कार्यक्रमको सुरुवात पनि उत्साहजनक हुन सकेन । नेतृत्वपंक्तिमै अन्योलका कारण आउँदो वैशाखमा गर्ने भनिएको अधिवेशन पनि अनिश्चयमा धकेलिएको छ । यहीबीच रास्वपाले आज सचिवालय बैठक राख्न लागेको हो ।