विराटनगर, असोज २२
महिला तथा बालबालिकालाई शसक्तिकरण गर्ने उद्देश्यले लायन्स क्लबले आज विविध कार्यक्रम गरेको छ । विराटनगर–१८, बुधनगरस्थित श्रीराम आधारभूत प्राथमिक विद्यालयलाई विभिन्न ५ वटा लायन्स क्लबले समूहगत सहयोग उपलब्ध गराएका छन् ।
लायन्स क्लबहरुले सो स्कुललाई नगद ६१ हजार र २५ हजार बराबरको जिन्सी सहयोग उपलब्ध गराएका छन् । स्कुलको छाना निर्माणका लागि १० बण्डल जस्तापाता खरिद गर्न नगद ६१ हजार र स्कुलमा अध्ययनरत अति विपन्न समुदायका बालबालिकालाई स्टेशनरी, खेलकुद सामग्री र टिफिन लगायतका सामग्री उपलब्ध गराइएको छ ।
लायन्स क्लब अफ विराटनगर एक्टीभ, विराटनगर बरगाछी, विराटनगर शुभम, विराटनगर सिटिजन र लायन्स क्लब अफ विराटनगर सिल्भरले संयुक्त कार्यक्रम गरी नगद र सामग्री हस्तान्तरण गरेको हो ।
लायन्स क्लब अन्तर्राष्ट्रियको आव्हानअनुसार पिछडिएका बालबालिका र महिलाहरुको सशक्तिकरणका लागि सोमबार विश्वका २१० राष्ट्रमा विभिन्न कार्यक्रम गरिने कार्यक्रम संयोजक एवम लायन्सका डिस्ट्रीक सेक्रेटरी रेबतबहादुर कार्कीले जानकारी दिए ।
