असोज २४,एजेन्सी
संयुक्त राष्ट्र संघका लागि अमेरिकी राजदूत निकी हेलीले मंगलबार आफ्नो पदबाट राजीनामा दिएकी छिन् । अन्तर्राष्ट्रिय सञ्चार माध्यमहरुका अनुसार अमेरिकी राष्ट्रपति डोनाल्ड ट्रम्पले उनको राजीनामा स्वीकृत पनि गरेका छन् ।
तर के कारणले हेलीले राजीनामा दिइन् भन्ने भने खुलासा भएको छैन । पहिले सन् २०२० को राष्ट्रपति चुनावमा उम्मेदवार बन्नका लागि हेलीले राजीनामा दिन लागेको हल्ला चलेको थियो । तर संयुक्त राष्ट्र संघका लागि अमेरिकी राजदूत हेलीले राजीनामा दिँदै आफू राष्ट्रपतिको उम्मेदवार बन्ने हल्लामात्रै भएको बताइन् ।
उनले आउँदो चुनावमा राष्ट्रपति ट्रम्पको पक्षमा नै प्रचारप्रसार गर्ने बताइन् । अमेरिकी सञ्चार माध्यमका अनुसार निकी हेलीले गएको हप्ता ह्वाइट हाउसमा राष्ट्रपति ट्रम्पसँग भेटेकी थिइन् ।
त्यसबेला नै उनले राजीनामा दिन लागेको कुरा बताएकी थिइन् । संयुक्त राष्ट्र संघका लागि अमेरिकाको स्थायी प्रतिनिधि बन्नुभन्दा पहिले निकी हेली साउथ क्यारोलाइनाको गभर्नरका रुपमा कार्यरत थिइन् ।
भारतीय मूलकी हेली राष्ट्रपति ट्रम्पकी करिबी मानिन्छन् । यस्तो अवस्थामा उनको राजीनामा राष्ट्रपति ट्रम्पका लागि ठूलो झट्काका रुपमा लिइएको छ ।
